Жангы мектеп ишлейдиле

Арт кезиуде «Билим бериу» миллет проектни жашауда бардыра, эллерибизде, шахарларыбызда жангы мектепле, садикле ишленедиле неда алагъа тынгылы ремонтла этиледиле. Ол санда Александровская станицада да жангы школну къурулушу бардырыла турады.

Бюгюнлюкде мекямны ичинде, тышында да ишле барадыла, суу, жылыу берлик ызла тохташдырыладыла, чардакъны, терезелени орнатадыла. Мектепни тёрт бёлюмю боллукъду, алада спорт эмда актовый залла, ашхана бла китапхана да къураллыкъдыла. Андан сора да, тёрели эмда профильли окъуу классла боллукъдула. Мекямны тийресинде спорт майданла да сабийлени къууандырлыкъдыла.

Мында эки жюз окъуучу бир жолгъа билим алырча онг чыгъарыкъды. Къурулуш ишле тохташдырылгъан жорукъгъа тийишлиликде бардырыладыла эмда ала бу жылны ахырына тамамланыргъа белгиленедиле.