Жангы амалны тинтгендиле

Кёп болмай Къабарты-Малкъар къырал университетде "Конструкциялы материалла бла аддитив технологияланы  медицинагъа сингдириу" темагъа жоралап  стратегиялы сессия болгъанды.

Анга КъМКъУ-ну илму-излем иш жаны бла проректору,  профессор Светлана Хаширова, Москвада  сабий хирургия эм травматология   жаны бла   илму-излем институтну  нейрохирургия эм   нейро жаралагъа бакъгъан бёлюмюню таматасы  Жанна Семенова,  республиканы клиника  больницасыны  нейрохирургия бёлюмюню баш врачы  Мартин Кишев,  Приволжск крайны сынау  онкология эм  биомедицина технологияла жаны бла  медицина  университетини  клетканы тинтген    лабораториясыны  таматасы  Марфа Егорихина, КъМКъУ-ну медицина академиясыны  микробиология, вирусология эм  иммунология кафедрасыны  таматасы  Заира Хараева,  прогрессив материалла бла   аддитив технологияла араны келечилери эм студентле къаышхандыла.

Жыйылыуну ача,  Жанна Семенова  КъМКъУ-ну аламлери бла  имплантла хазырларча проект бла кюрешгенлерин, аны жетишимлилигини юсюнден да хапарлагъанды.

Ол айтханнга кёре, бюгюнлюкде къыралда  имплантла бла жалчытыу бек осалды. Дунияда кенг белгили болгъан  медицинагъа жараулусу  кёбюсюнде    титандан этиледи. Болсада  сюекни орунуна салыннган имплантладан  эм игисине    полиэфирэфиркетондан этилген саналады.  Аны бирси къыраллада кёп жылланы ичинде хайырланадыла.  Жарсыугъа, Россейде  аны  производствосу бла киши кюрешмейди.

- Бизни проектибизни магъанасы аллай материалдан  имплантла этергеди.  Бусагъатда аны къыстау   хазырлап кюрешебиз.  Ол  белгили материаллагъа  бир тюрлю зат бла оздурмазлыгъын да энчи белгилерчады- дегенди Жанна Семенова.

Ызы бла Светлана Хаширова  жангы продукцияны юсюнден доклад этгенди. Ол санда прогрессив материалла эм  аддитив технологияла арада жарашдырылгъан материалла бла шагъырейлендиргенди.  Ол билдиргенича,  материал титан бла тенглешдиргенде,  къурамы бла  сюекге аламат келишеди.   Аны бла бирге  полиэфирэфиркетон  экология жаны бла таза эм кимге да жарашхан   материалды.
- Эсге сала айтсакъ, полиэфирэфиркетондан  медицинагъа жараулу   материалла жарашдырырча  бизден сора техника бла тынгылы жалчытылыннган  жокъду. Бюгюнлюкде  жангы технологияланы хайырындан аланы уллу кюч салмай чыгъарыр амал барды. Сёз ючюн,  3D-печать бла. Ол белгили аналогларына бир зат бла оздурмайды эм медицинада жетишимли хайырланылады.

Клиникалы тинтиуле да бардыргъанбыз,  къоркъуусузлукъ жаны бла паспорт къоллу да  болгъанбыз. Алай бла материал адамны саулугъуна заран жетдирмезлигине шагъатлыкъ этеди. Ол себепден  мындан арысында полимерледен  медицинагъа  жараулу тюрлю-тюрлю затла чыгъарыр умутубуз барды- деп къошханды Светлана Хаширова.

 
Адамны саулугъуна къоркъуусуз болгъанларыны эм хайырланыуну  юсюнден Заира Хараева бла Марфа Егорихина да тынгылы  докладла этгендиле. 

- Медицинада хайырланнган полимерлеге жарашдырылгъан кезиулеринде окъуна эс бурургъа керекди.  Бизни лаборатория танг кесек жылны бу жаны бла тинтиуле бардырады. Аны бла байламлы бюгюнлюкде  КъМКъУ-ну арасы бла бирге бир тюрлю материалда тохтагъанбыз, мындан арысында аны къурамын игилендирирча  кюреширикбиз. Андан тышында да,  башха   полимерлеге да эс бурурчады. Бу жаны бла байламлыкъда ишлерча алыкъа уллу иш барды- дегенди Марфа Егорихина.

Ахырында алимле бла сынамлы врачла кёп тюрлю къыйматлы  сорууланы сюзгендиле. Саулай алып айтханда, жыйылыугъа къатышханла бирден  полимерлени  медицинагъа кереклисин, диагностикада эм багъыуда да  жангы онгла ачханлары бла бир оюмгъа келгендиле.