Заранлы губулагъа сакъ болугъуз!

Губула къан ичип, кёп тюрлю аурууланы жаядыла. Быллай заранлы затладан бири Ornithodoros деген губуду, ол тонгузланы африкалы эминасын ауругъан малладан саулагъа женгил кёчюреди.

Россельхознадзорну специалистлери айтханларыча, башха губула жылны бир кезиуюнде тири болуучу эселе, бу зат иссиде, сууукъда да сау турады. Ичинде къанны да аслам заманны тутуп, аурууну жайыу кючюн тас этмейди.

Ornithodoros кёп жерледе жашайды, бегирекда чыпчыкъланы уяларында, дагъыда мал, ат, тонгуз, тауукъ орунлада, топуракъ къабыргъалада эмда отоу тюпледе.

Губу кюндюз угъай, кече тири болады. Нек дегенде, кеси аллына ары-бери баралмагъаны ючюн, къабарыкъ мал тынчайырын сакъларгъа тюшеди. Ол кезиуде аны тюклерине тагъылып, терисине жабышады. Къапхан жерине ачытханын сездирмеген абери жибергени ючюн мал аны билмейди. Ызы бла алайы къызарып, тамгъа-тамгъа болады.

Бу губуну чычханла да кёчюредиле. Профилактика жумушлада аланы къырыу да бек къыйматлы боллукъду, дейдиле специалистле. Дагъыда мюлкде ишчилени юс кийимлерин, маллагъа къарагъанда хайырланылгъан затланы, транспортну да дезинфекция эте турургъа тийишлиди. Бу ишде кёбюсюнде формальдегид неда къайнар суу хайырланылады.

Малланы юслеринде быллай губуланы кёрсегиз, Россельхознадзоргъа 8(8662)77-81-94 номер бла сёлешигиз. Дагъыда ветеринар службагъа билдирирге боллукъду. Аны келечилери губуланы лабораторияда тинтип, ала къайсы тюрлюсюне саналгъанларын жик жиги бла айтырыкъдыла.