Адамлагъа таплыкъгъа – жангыртылгъан жол

Хасанияда Аттоланы Салихни атын жюрютген орамны тёрт километри жангыртылгъанды. Жолну халы аман болгъаны ючюн, адамла кёп жылны къыйналып тургъандыла. Жангыртыу ишле талай айны бардырылгъандыла, аланы шахарны коммунал службасы, жолчула да тамамлагъандыла. Эм къыйыны къурулушладан сора коммуникацияла бла байламлы чурумла чыкъгъаны болгъанды. Ремонт этгенде аланы да тап халгъа келтирирге тюшгенди.

Хасанияны администрациясыны башчысы Азаматланы Къайсын айтханыча, къайда къайсы ыз баргъанын белгилеген картала жокъ эдиле, ол а ремонт ишлени тамамлаугъа чырмау болгъанды. Кертиси бла да, жолну тапландырыугъа къыйын ишчиле, хасаниячыла кеслери да салгъандыла. Къурулушчула бла жолчула ауур инструментле бла ишлегендиле, элчиле уа аланы хычинле, айран бла сыйлагъандыла. Бусагъатда анда коммуникацияла жаны бла чурум жокъду, бек башы уа, битеу тартылгъан ызланы картасы жарашдырылгъанды. Алай бла жол управленияны келечилери орамда къоркъуусуз эм тынч барырча къолдан келгенни аямагъандыла. 

Жолну мурдору алышыннганды, эки къатлы асфальт салыннганды, адамла жюрюген, арбазланы къатларында кесеклери тапландырылгъандыла, тийрелеринде майданла айбатландырылгъандыла, дегенди управленияны бёлюмюню баш специалисти Аюб Абрегов.

Бу жол бла чекленмей, Нальчик сууну къаты бла баргъан жолгъа да къаралгъанды. Аны бла элге кирмей барыргъа, жагъада солургъа да боллукъду, тийреси да жасаллыкъды.