Муратына жетер ючюн, арымай-талмай кюрешгенди

Огъары Малкъардан белгили гёжеф Алтууланы Аслан усталыкъ билимни Къабарты-Малкъар къырал университетде юридический жаны бла алгъанды, болсада жашауун право бла байламлы уа этмегенди.

Спорт бла Аслан гитчеликден кюрешеди, алгъа боксдан жарау этгенди, бир кесекни тутушуп да кёргенди. Боксда биринчи тренери Гузойланы Асхат болгъанды, спортха да жаш гёжефни ол келтирген эди. Андан сора физкультурадан устазы Эндрейланы Дауутну къолунда юйреннгенди. Студент заманында да боксну къоймагъанды - Хапаланы Салихде жарау этгенди. «Кюндюз окъууда тургъанбыз, ингирде уа – залда. Эришиулеге школ заманымдан бери да къатышама, республикалы турнирледе хорлагъанма. Алай профессионал халда эришиб а алгъаракълада къатыш единоборстволадан башлагъанма», - дейди ол.

Единоборстволагъа  карате, бокс, тутушуу да киредиле. Анда жорукъла жокъдула дегенликге, ала бардыла. «Бир-эки жылны Тюменланы Альберт, аны бла жарау этгенле бла юйрениу-жарау этиу жыйылыулагъа бара тургъанма, - деп эсгереди Аслан. - Кертисин айтханда, единоборстволагъа Альбертни юсюнден эшитгенден сора эс бургъанма, ол кёплеге юлгю болгъанды. Ставропольда эришиуде рингге 70 килограмм ауурлукъ категорияда чыкъгъанма. Спортну башха тюрлюлериндеча болмай, анда бир ауурлукъ категорияда жангыз экеулен тюйюшедиле. Бир кесек аууруракъ тартханым ючюн, терк окъуна арыгъыракъ болургъа тюшгенди. Аны ючюн къарыуум бираз таркъайып, хорлаялмагъанма».

Рингге чыкъгъан тынч иш тюйюлдю, бютюнда биринчи кере. Къоркъгъанынг, сагъайгъанынг болгъанмыды деген сорууума жууап бере, ушакъ нёгерим алай сезимлени кеси да сынагъанын, ал кезиуде ким да къоркъгъанын чертеди. Алай былайда сёз чып тюшюреме, ачыйма деген къоркъууну юсюнден бармайды. Аллай жерде санга къараргъа келгенлени алларында жууаплылыгъынгы сезесе, аланы жарсытыргъа сюймейсе. Хорлдатханда,  биргеме келгенле кёл этдиргендиле, аллай мен а алыкъа кесими кечалмайма, деп къошады ол. 

- Бу спортха кеч келгенсе, дерикле да болурла. Алай жаш адамлагъа айтырыгъым, 20-25 жыл толгъанды, манга спорт бла кюреширге кечди деп мугурайып, тохтап къалыргъа жарамайды. Арымай-талмай, кючюнгю аямай жарау этиу – муратынга жетдирмей къоярыкъ тюйюлдю, ол къыйынынг зырафына кетмез. Фахму, кюрешмесенг, тас болуп кетеди, къыйынынг а - угъай. Мен оюм этгенден, спорт адамгъа кюч-къарыу бергенден тышында, чыныкъдыргъан этеди. Спорт бла кюрешиуню баш магъанасы алтын майдалла угъай, юйретиудю. Жаш тёлю жетишимли адамлагъа къарап, алача болургъа итинирча этерге керекди. Ала, заманларын бошуна оздуруп, тютюн ичип, башха аман къылыкълагъа алданып, орамлада керексизине айланмазча. Инсан спортда не излегенин да табарыкъды – тенглени, усталыкъны, файданы да. Алай къатыш единоборстволагъа 8-9-жыллыкъ сабийни бериуню дурус кёрмейме, бу жыл санда тутушуу, жюзюу, гимнастика игидиле. Нек дегенде, мында саулукъгъа чып тюшерге къоркъуу бек уллуду, - деп белгилейди Алтуу улу.

Аслан саулукълу жашау бардырыу жанлыды. Эрттен сайын 3-4 километрни чабады, ингирде, бек  азындан, эки сагъатны жарау этеди. Юч сабийини  атасыды – эки къызны  бла бир жашны. Ала алыкъа гитчечикледиле, алай ёсселе спортха берир муратлыды. Кеси заманында тренери, башда айтылгъаныча, аны аман къылыкъладан сакъланыргъа юйретгенди, тютюн, ичги заранлы болгъанларына  ол тюшюндюргенди. Аслан да, андан юлгю ала, сабийлени юйрете, халкъына жараргъа итинеди.