Айырыучула ышаныулукъларын энтта бир кере кёргюзтгендиле

Къол кётюрюуню бирикдирилген кюнюнде «Единая Россия» къыралда баш политика кюч болгъанын энтта бир кере ачыкъ этгенди. Айырыуланы асламында аны келечилери кёпчюлюкню алгъандыла. Сайлауланы эсеплери бу кюнледе ТАСС-да бардырылгъан тюбешиуде белгили этилгендиле.

Битеу да бирге айырыулагъа партияны 36 минг келечиси къатышхандыла, регионлада ала 35 минг мандат къоллу болгъандыла. Партияны баш советини таматасы Борис Грызлов алай бла «Единая Россия» къыралда баш политика кюч болгъанын энтта бир кере кёргюзтгенин чертгенди.

- Айырыучула Президентни политикасы жанлы болгъанларын эм бизге ышаннганларын билдиргендиле. Бу кампанияны баш энчилиги уа жангырыудады. Айырыулада хорлагъанланы 80 проценти – жангы адамладыла. Партияны тизгинлерин жангыртыуну магъанасын барыбыз да иги ангылайбыз,-дегенди ол.

  Борис Грызлов къол кётюрюу къыйын политика болумда баргъанын, айырыулагъа чырмаргъа кюрешген  кезиуле болгъанларын билдиргенди. «Алай басыулукъгъа россейли жамауат бютюнда биригип, Президентге тутхучлулукъ этип жууаплагъанды»,-деп къошханды.

Партияны генсоветини секретарыны къуллугъун толтургъан  Владимир Якушев а айырыуланы эсеплери бла шагъырей этгенди. Ол айтханыча, Къырал Думада юч  мандат бар эди, аланы да «Единая Россия» къытханды. Къыралны 21 регионуну башчылары сайланнгандыла. Алада да «Единая Россия» кёргюзтген кандидатла хорлагъандыла. Тёрт регионну оноучусун а законла чыгъарыучу органланы депутатлары сайлайдыла, Ханты-Мансий автоном округда бла Ингушетияла сайлаула болгъандыла. Алада да партияны кандидатлары алчыладыла. Энтта эки регионда айырыула жууукъ кезиуде бардырыллыкъдыла.

 13 регионну законла чыгъарыучу органларыны депутатлары айырылгъандыла. «Единая Россияны» келечилери алада 64,6 процентин къытхандыла. Алай бла партияны келечилери къыралда битеу мандатланы 82 процентин алгъандыла.

Энчи аскер операциягъа къатышхан 308 инсан айырыулада хорлагъанларын иги жетишимге санагъанды Владимир Якушев.

  - Биз алагъа айырыу кампания узуну болушханлай тургъанбыз. Баш партия школ да тамамлагъанды бу жаны бла тийишли жумушла. Башха партияла да кёргюзтгендиле тизгинлеринде СВО-гъа къатышхан жигитлени. Болсада бизни партия жанлыла барысындан да кёпдюле,-дегенди ол.

Владимир Якушев  депутат къауум жангыргъанын иги шартха санагъанды. Ол бу тёре андан ары бардырыллыгъын белгилегенди.

Быйыл айырыула бла бирге партия 2026 жылда федерал къол кётюрюу кампаниягъа хазырланып  башланнганын чертгенди ол.

 - Мындан ары барыбыз да бирге къадалып кюрешсек, федерал сайлаулада  жетишимли боллугъубузгъа ишексизме. Алай бла салыннган борчланы хайырлы тамамлаяллыкъбыз,-деп къошханды.

КъМР-ни Башчысы, партияны регион бёлюмюню секретары Казбек Коков регион президиумну жыйылыуунда «Единая Россияны» депутатларын жетишимле бла алгъышлагъанды, деп билдиргендиле   kabardin-balkar.er.ru сайтда.

Ол Парламентни 7-чи чакъырылыууну депутатларын сайлагъанда, партия кёпчюлюкню къытханын белгилегенди. Аны жанлы кеслерини ауазларын   263 455 адам бергендиле. «Ол а жамауат партиягъа ышаннганын, аны башламчылыкъларына тутхучлукъ этгенин энтта бир кере кёргюзтеди. Партияны халкъ программасыны магъанасы да уллуду. Тамамланнган жумушла кёпдюле. Алай мындан ары да борчларыбыз уллудула. «Единая Россия» кёпчюлюкню партиясыча жууаплылыкъны  кесине алады. Бу къыйын, сынаулу заманда уа социал соруула, экономиканы айнытыу жумушланы тамамлау да партияны иши болгъанды»,-деген эди жыйылыуда Казбек Коков.