Саулукъ сакълау махкеме жангы шёндюгюлю болумлагъа келиширча этилгенди

Къабарты-Малкъар Республиканы Башчысы Казбек Коков Нальчикде «Александровка» микрорайонда 2-чи номерли шахар поликлиниканы ремонт этилген бёлюмюне къарагъанды. Ишлени саулукъ сакълауну биринчи звеносун тапландырыу программагъа тийишлиликде бардыргъандыла. Республиканы таматасыны биргесине анда КъМР-ни Правительствосуну Председатели Мусукланы Алий, КъМР-ни саулукъ сакълау министри Рустам Калибатов болгъандыла.

Мекям 70-ден артыкъ жыл мындан алгъа ишленнгенди, андагъы болумла бюгюннгю саулукъ сакълауда мардалагъа бла ёлчемлеге келишмей эдиле. Медицина махкеме анга байланнган 89 мингден артыкъ адамны саулукъ бла байламлы жумушларына къарайды. Микрорайонда жашагъанла аны тийишли халгъа келтирирча тилеклерин бир ненча кере билдиргендиле.

Тынгылы ремонтдан сора поликлиника тийишли халгъа келтирилгенди. Мында толусунлай инженер ызла, терезеле бла эшикле, юй тюплери алышыннгандыла, майданла кенгертилгендиле эмда медицина организацияны кереклерине бегирек келишген перепланировка этилгенди.

Поликлиниканы баш врачы Марина Емузова билдиргеннге кёре, ол ишни табыракъ бардырыргъа, аяулу технологияланы сингдирирге – бёлюмлени, процедурныйлени, специалистлени кабинетлерин, навигацияны тапландырыргъа, жукъгъан ауруулагъа ишеклиликлери болгъан саусузлагъа кирген жерни энчилерге, сакълау жерлени жарашдырыргъа онг бергенди. Отоулада жарыкъ эмда ырахат болгъанды. Махкемени тышы да шёндюгюлю халлы этилгенди, тийреси да тапландырылгъанды.

Казбек Коков коллективге жетишимле тежегенди эмда жангы болумлада врачлагъа, саусузлагъа да тап боллугъуна ишексизлигин билдиргенди.