Къоркъуусузлукъну жалчытыуну – жангы даражагъа

Къабарты-Малкъарны Жамауат палатасында Росгвардияны ведомстводан тышында къалаууру эм къоруулау предприятияла инсанланы эм организацияланы эркинликлерин къалай сакълагъанларын сюзгендиле.

Республикабызда адамла аслам жыйылгъан жерледе къоркъуусузлукъну жалчытыугъа уллу магъана бериледи. Аны ючюн а къоруулау организацияланы башха-башха тюрлюлери жууаплыдыла. Къырал низамны сакълау бла Росгвардияны энчи бёлюмю – ведомстводан тышында къалаууру кюрешеди. 

Росгвардияны республикада управлениясыны къоруулаугъа эм къоркъуусузлукъну жалчытыугъа инженер-техника амалланы сингдириу эм къурау бёлюмюню башчысы Антон Герасимов айтханнга кёре, ала борчлу халда сегиз объектге къарайдыла, ол санда Россейни Банкыны бёлюмюне, «РусГидро» обществогъа, Басхан нейтринный обсерваториягъа, «Нальчик» халкъла аралы аэропортха. Андан тышында, бёлюм ишини тёрт мингден аслам объектде да бардырады, аладан эки мингинден кёбюнде энчи техника хайырланылады. Управленияны лицензия-эркинлик бериу иш жаны бла бёлюмюню башчысыны орунбасары полицияны подполковниги Жаболаны Мухаммат билдиргенича, бюгюнлюкде регионда эсепде энчи иели (ЧОП) 33 къалауур организация барды, ала 1712 объектни сакълайдыла. 

Шёндюгюлю болумла стратегия магъаналы объектлени къоруулаугъа жангы излемле салады. Аны ючюн ЧОП-ла билим бериу эм саулукъ сакълау учреждениялада халгъа бютюн сакъ болургъа тийишлидиле. «КабБалкБезопасность» обществону директору Къоруулау бёлюмлени башчыларыны ишлерин къурау федерал араны регионда биригиуюню башчысы Вячеслав Кучмазоков белгилегенича, мектепле эм башха билим бериу учрежденияла энчи къалауурдадыла. Алагъа кимле киргенлери суралады, видео амалла бла ичлеринде эм тёгереклеринде хал, учрежденияны ичинде низам да эсепде турадыла, тийрелерине къалауурла чыгъып къарайдыла. Хар къоруулау постда терк болушлукъ чакъырырча «кнопка» барды. Болсада, уллу жууаплылыкъ салыннганлыкъгъа, заказчикле къалауурлагъа хакъны тёлерге ашыкъмайдыла, кечигип бередиле. Аланы ишине тёлеуню ёлчемин заказчик кеси тохташдырады. Торгланы эсеплери жангызда тендер бошалгъанындан сора ачыкъ этилгени Росгвардиягъа аланы контрольда тутаргъа тыйгъыч этеди. «Улутхачылыкъгъа къажау кюреш бардырыу эм жамауат къоркъуусузлукъну жалчытыугъа себеплик этиу жаны бла комитет» регионла аралы жамауат биригиуню управлениясыны башчысы Къудайланы Аслан чертгеннге кёре, торгланы кезиулеринде къырал излемлеге келишмеген, битеу керекли мюлк-техника амаллары болмагъан къоруулау предприятияла хорлагъан кезиуле аслам тюбейдиле. Келишимни багъасын азайта, ала ишчилерине да ахчаны тийишлисича тёлемейдиле, ол угъай, аланы санын да азайтадыла, урунуу келишимлени тауусмагъанлай, налогладан да къутулургъа кюрешедиле. Бу шартла барысы да къоркъуусузлукъну жалчытыуну качествосун осал этедиле.

Тамамланылгъан жумушланы качествосуна багъа бичгенде къоруулау организацияланы ишчилерини усталыкълары да уллу магъананы тутады. Объектледе эм адамла аслам жыйылып бардырылгъан меропритиялада къоркъуусузлукъну сакълаугъа жангызда къоруулаучу болгъанына шагъатлыкъ къагъытлары болгъан эмда жыл сайын медицина учреждениялада тинтиулени ётген инсанла жибериледиле, деп билдиреди «Черкесс» къоруулау организацияны таматасы Ахмед Мисроков. ЧОП-ла ишчилерин юйретиуге эс бурадыла, аны ючюн ахчаларын да аямайдыла. Къалауурланы профессонал хазырлылыкъларына уа, башха ышанладан сора да, ол белгилегенича, адамла бла ишлей билиу, къыйын болумлада терк оноу этиу да киредиле.

Айтылгъан оюмла бла байламлы палатаны Жамауат къоркъуусузлукъну жалчытыу, законлукъну сакълау эм ОНК бла байламлыкъла жюрютюу жаны бла комиссиясыны башчысы Хачим Машуков Жамауат палата бла бирге Лицензия-эркинлик бериу арада къоруулау организацияланы ишлерин тинтген эм анга багъа бичген комиссияны къурауну, анга Монополиягъа къажау службаны, Федерал налог службаны, Урунуу инспекцияны бёлюмлерини, палатаны, жамауат организацияланы да келечилерин чакъырыуну къабыл кёргенди.