Китапханагъа - юйлеринеча

Жаболаны Ализаде Къабарты-Малкъар къырал университетни коммунал-къурулуш колледжинде социал психологиядан устаз болуп ишлегенли иги кесек заман болады. Алгъаракълада уа анга дагъыда китапханагъа башчылыкъ этиуню буюргъандыла.

Ализаде анда урунуп башлагъанлы, кёп тюрлю ишле къураладыла. Алай бла жыл сайын   халкъыбызны акъылманлары Мечиланы Кязимге, Къулийланы Къайсыннга, дагъыда башха белгили адамларыбызгъа аталгъан китап эмда сурат кёрмючле къурайды. Ала не заманда да бек сейирлик эмда эс бурурча боладыла.  Студентле да бек жаратадыла кёрмючлени.

Алгъаракълада уа ол белгили дагъыстанлы поэт Расул Гамзатов туугъанлы 100-жыллыгъына жоралап, бек уллу кёрмюч жарашдыргъанды. Анда аны китаплары, аны юсюнден тюрлю-тюрлю жыллада жазылгъан статьяла, сейирлик хапарла, документле да кёп эдиле. Окъугъан къызла бла жашла кёрмючде поэтге жораланнган, бу жолгъа дери хазна басмаланмагъан иги кесек сейирлик затла кёп тапхандыла.
     Андан сора да, республикада белгили поэтле, жазыучула Табакъсойланы Мухтар, Болатланы Юруслан эмда башхала бла тюбешиуле да къурала- къурала турадыла. Библиотеканы залы уллуду, аны себепли анда класс сагъатла, мастер-классла да бардырыладыла.

Колледжледе бухгалтер-экономистлени, къонакъ юйледе сервислени къураучуланы, газ мюлкде урунурукъ техниклени, компьютерледе ишлериклени, дагъыда алагъа ушаш кёп башха усталыкълагъа юйретедиле. Битеу алагъа уа окъууларында уллу себепликни библиотекачы Жаболаны Ахматны къызы Ализаде этеди. Ол студентлеге курсовой ишлерин хазырларгъа, жазаргъа да болушады. Керек болса уа, китапханада компьютерде излегенлерин да табып береди.

Арт бир ненча жылдан бери уа, библиотекада Электрон амал да къуралгъанды. Жаш адамла кеслери женгил кирип, керекли китапларын ачып окъуйдула, докладларын жазадыла.

Студентлеге Ализаде не заманда да ёз сабийлеринеча болады.

- Мында окъугъанланы асламысы узакъ элледен, ол угъай да, Ингушетиядан, Шимал Осетия-Аланиядан, Чечен республикаладан да келедиле. Алагъа иги болмай къалай къалгъын. Аны себепли къолумдан келгенича болушургъа кюрешеме, - дейди таулу тиширыу.