Ток ызлагъа жангы объектле къошуладыла

«Россети Шимал Кавказ» компанияны Къабарты-Малкъарда бёлюмю – «Каббалкэнерго» - быйылны ал жарымында электрокюч сетьлеге 1,3 минг жангы хайырланыучуну эмда объектлени къошханды. Аланы барына да 20,4 МВт жибериледи, деп билдиргендиле энергетикле.

Хар заманладача, бу кезиуде да баш магъана социал объектлеге берилгенди. Энергетикле сетьлеге, сёз ючюн, Майский шахарда ишленнген 330 жерли жангы школну къошхандыла. Ол учрежденияны отоулары эркиндиле, тынгылы ашханасы, китапханасы да барды анда. Къыйналып жюрюгенлеге уа кётюрюучю устройствола орнатхандыла.

Энергетикле дагъыда Нальчикде мектепледен бирини къатында жангы корпусну къурулушун 600 киловатт бла жалчытхандыла. Анда ишле «Билим бериу» миллет проектни чеклеринде бардырыладыла. Объект хазыр болса, анда лаборатория, мастерской да ишлерикдиле. Дагъыда окъуучулагъа асламыракъ жер боллукъду.

Саулай айтханда, сагъынылгъан алты айны ичинде компаниягъа 1,6 минг заявка (ол санда Портал-ТП.РФ порталда да) берилгенди. Алагъа битеу да 65,8 МВт электрокюч изленеди. Сетьлеге къошуу иш андан ары барады.