Миллет байлыгъыбыз кёплени сейирсиндиргенди

Озгъан ыйыкъда Владикавказда Север Осетия-Алания Республиканы 100-жыллыкъ юбилейине жораланып  китап кёрмюч ётгенди. Аны регионну Басма эм асламлы коммуникацияла жаны бла комитети Россейни Китапла чыгъаргъанларыны ассоциациясы бла бирге къурагъанды.

Бу байрамгъа къатышыргъа Шимал Кавказдан битеу да 8 республиканы келечилери чакъырылгъан эдиле.     «Къарачай-малкъар халкъны маданият совети» деген жамауат организация да аланы араларында болгъанды. Кёрмючге ала халкъны тарыхы, маданияты, жашау турмушу бла байламлы болгъан китапланы элтгендиле. Советни директору Биттирланы–Къочхарланы Людмила айтханнга кёре, ала анда миллетибизни тийишли даражада кёргюзтгендиле. Китапланы сау ыйыкъны ичинде жыйышдырыргъа тюшгенди. Башхала экишер тапканы алгъанда, ала элтген китапла ючюсюне кючден сыйыннгандыла.

- Китапланы ыйыкъны ичинде жыйышдыргъанбыз. Аланы асламы сатаргъа угъай да, кёрмючге деп элтилгенле болгъандыла. Быллай ишге биринчи кере къатышханыбыз себепли, баш муратыбыз малкъар халкъ нечик бай болгъанын кёргюзтюрге эди да, ол муратыбызгъа жетишалгъанбыз, деп айталлыкъма.

Хунерли адамларыбыз болмагъанча кёпдюле. Жабелланы Лидия, Абшаланы Магомет, Байсыланы Марзият кеслерини китапларын бизге берирге угъай демегенлери ючюн, бек ыразыбыз. Кертиси бла да, аланы жаратып сатып алгъанла аз тюйюл эдиле. Дагъыда 90-чы жыллада басмадан чыкъгъан китапларыбызгъа да энчи эс бёлюп, сатарыбызны окъуна тилей эдиле. Сёз ючюн, малкъарлыланы жашау журтла ишлеулерини юсюнден китапла, тарыхыбыз бла байламлыла да жангыдан чыгъарылсала, бек иги боллукъ эди. Дагъыда Османланы Хыйсаны «Балкария сквозь века» деген аламат жарашдырылгъан китап да кёплени сейир этдиргенди.

Китапларыбыз тургъан жерни  жасаргъа къолдан уста къызларыбыз Къулийланы Марина бла Бабаланы Индира да юлюшлерин кхошхандыла. Ала кеслерини гинжилерин бла суратларын берген эдиле да, алагъа да бек ыразыбыз.  Адамла  бизни къатыбызда аслам тохтай эдиле. Китап чыгъарыучуланы ассоциациясыны Шимал Кавказда биригиуюню таматасы Анзор Матаев да байламлыкъла жюрютюрге чакъыргъанды да, анга да бек ыразыбыз.  Ол бизни  Россейни китапла чыгъаргъанларыны ассоциациясыны таматасы Константин Чеченев бла да танышдыргъанды. Мындан ары да миллетибизни бу жаны бла да айнытыу ишге аслам магъана берир муратлыбыз,- дегенди Биттирланы–Къочхарланы Людмила.

Юч кюн баргъан кёрмючде кёп сейир затла кёрюр амал бар эди. Аладан бири 1798 жылда осетин тилде басмаланнган биринчи китапчыкъ, Владикавказ шахарны эрттегили суратлары, Дагъыстандан келтирилген аламат сабий китапчыкъла.

  Бардырылгъан ушакъланы кезиулеринде кёп жарсыулагъа да эс бёлюннгенди. Аладан бири къонакъбайлыкъ этген регионда былтыр  жангыз бир сабий китап басмаланмагъаны эди. Ол жарсыулу болумну мындан энчи эсепге алыргъа деп оноу этилгенди.