Керти да насыплы адамды ол

Кучменланы Мухарбекни къызы  Къантемирланы Ольга  Къазахстанда туугъанды. Таулу халкъ Ата журтларына  къайтхандан сора уа  Къашхатауда орналып, жашау ыз къурагъандыла. Аны атасы  Мухарбек, ол кезиуде Ич ишлени министерствосунда ишлегени себепли 1961  жылда аны  Тырныаууз шахаргъа ашыргъандыла. Ол жылдан башлап, мени жигитими жашауу Тырныаууз бла байланнганды. Мында ол 1-чи номерли школну бошап  устаз болургъа сюйген эди. Алай  жашауну анга башха умутлары болгъандыла. Бюгюнлюкде Ольга сайлагъан усталыгъы, жашагъан жолу ючюн да арталлыда сокъуранмайды.

Усталыкъны сайлауда анга алагъа терк-терк келе туруучу жууугъу болушханды. Ол заманда Нальчикни медицина училищесинде ишлей эди ол. Ольга да окъууну бошагъанлай, медицина жаны бла билим алыр муратда, ары киреди. Хар нени да билирге сюйген къыз, кёп тюрлю дерсле бла шагъырей болгъанына, медицинада билим ала тургъанына да бек ыразы эди. 1972  жылда училищени бошап, фельдшер болуп, Тырныауузну медико-санитар бёлюмюне ишлерге келген эди. Терк медицина болушлукъ этген службада эки жыл ишлеую, сёзсюз,  анга аламат сынам болгъанды.

Андан сора да, эки жылны кёзлеге къарагъан врачны медсестрасы болады. Тырныаууз шахар окулистсиз къалгъанында, врачны, медсестраны ауурлугъу да Ольга Мухарбековнаны юсюнде болгъанды. Алай  окъуугъа, билим алыугъа итиниуюн ол бир заманда да къоймагъанды. Медсестралыкъ ишин бардыра тургъанлай, неврология бла хирургия бёлюмлени да окъуп билген эди.

Ольганы баш иеси  Хаджимурат Халимовични Монголияда тау байыкъландырыучу комбинатны шахта ишлеучю управлениясына ишлерге ашыргъанларында, биргесине юй бийчеси Ольга да барып, анда саулукъ сакълагъан пунктда юч жыл ишлеп, Тырныауузгъа 1980 жылда къайтхандыла.

Къызлары Альбина да мында туугъанды. Ол  анасыны муратын жашаугъакийиргенди. Бюгюнлюкде  Тырныауузну 1-чи номерли лицейинде башланнган классланы устазы болуп ишлейди.

Ольга  къыркъ жыл мындан алгъа, Тырныауузда санитар-эпидемиология тинтиуню арасына врач эпидемиологну болушлукъчусу болуп келген эди.  Жууаш коллективге тюшюп, ишини не жаны бла да тасхаларына юйреннгенди.

«Ишимде эслилик бек магъаналыды. Мени уа анга ишчи нёгерим Ада Николаевна Смирнова юйретгенди. Бир тюрлю чурум ычхындырсам ишимде, ол сабыр ауаз бла манга: «Кесинги халатынгы кесинг тапчы!» - деп, алай юйретгенди. Мен да жангыдан тюпден-башха ишими тинтип чыгъып,  халатымы табыучу эдим», -дейди мени бюгюннгю жигитим.

Эпидемиологну ол заманда жумушу кёп эди. Саулай да районну участокларында тинтиу-сынау ишле ол врачны борчу эди. Ала - сабий садла, билим бериу учрежденияла, багъыу-профилактика жалчытхан пунктла, больницала бла поликлиникала, амбулаторяла-дагъыда башхала.

Районну санитар службасында Ольга Мухарбековна 40 жылдан бери ишлейди. Бийик категориялы специалист, эпидемиолог  кесини жашауун сабийлени бла абаданланы саулукъларын сакълаугъа жоралагъанды. Ол Федерал араны, КъМР-ни бу службасыны управлениясыны да саугъаларына тийишли болгъанды. Ольга Мухарбековна «Санэпидемслужбаны алчысы» деген белги бла да саугъаланнганды.

Бусагъатда окъуна, элли жылгъа жууукъ сынамы болгъанлыкъгъа, Ольга кесини билимин ёсдюрюр муратда, кёп тюрлю курслада окъуйду. Заман бизге салгъан излемлеге жетишир ючюн, хар кюнден билим айнытыугъа уллу эс бурмай амал жокъду. Аны себепли  сынамлы эпидемиологну даражасы да бийикдеди. Ол бюгюн да районну эпидемиология арасында ишин бардырады. Жаш кадрлагъа  кесини сынамын ётдюреди.

Ишчи жолдашлары аны низамлы, ариу къылыкълы, жууаш, кесинден таматала бла, гитчеле бла да ариу келише билген, аламат адам болгъанын айтадыла. Аны юйю не заманда да къонакъладан толу болады. Ольга керти юй бийче, аламат ана, жюрек жылыулу эгеч да болалгъанды.

Ынналыкъ а  аны жашауун, жюрегин да жарытхан, ёхтемлик келтирген хычыуун сезимди. Ишчи жеринде, юйюрюнде, жашагъан тийресинде да аллай махтаугъа тийишли болалгъан Ольга Мухарбековна керти да насыплы адамды.