Товарлагъа, маллагъа да борчлу халда белгиле

Роспотребнадзорну КъМР-де бёлюмю Россей Федерацияда чыгъарылгъан товарланы энчи маркировкалары болургъа керегин эсге салады. Белгилисича, биринчи кере контроль идентификация белги (КИЗ) териден этилген кийимледе хайырланып башланнганды.   

Ызы бла маркировка тютюн продукциягъа, аякъ кийимге, женгил промышленностьну товарларына, дарманлагъа, сют продукциягъа, татлы суулагъа, ичгилеге эм башхалагъа да салыннганды.

Аны магъанасы къырал чыгъарылгъан товарны юсюнден толу хапар билирча этергеди. Сёз ючюн, быллай  амал чыгъаргъан жерден алыучугъа дери жолун контрольда тутаргъа онг береди. Андан сора да, тийишли белгини хайыры бла рынокда ишекли (контрафакт) товарла азайтыллыкъдыла. Аны бла бирге аланы болумлары да игилендирилликди.

Законнга бузукълукъ этмез ючюн, чыгъарыучула  товарлагъа белги  этген къырал информация системада регистрацияны ётерге керекдиле. Ол санда анда къаллай бир товар чыгъаргъанларыны юсюнден дайым билдиргенлей турургъа тийишлидиле.

Аны бла бирге «Керти белги» система да алыучуланы эркинликлерин къорууларгъа болушады. Сёз ючюн, энчи приложение ишекли продукцияны тинтирге болушурукъду. Хуржунда жюрютюлген телефонну камерасы бла продукцияны юсюнде Data Matrix (штрихкодну) окъургъа эм аны юсюнден толу хапар билирге боллукъду.

Жыл башланнганлы тютюн сатхан сатыу-алыу жерледе  ишлери бла шагъырейленирча жыйырма беш плансыз рейд бардырылгъанды. Аны кезиуюнде белгисиз  танг кесек продукция сатылгъаны ачыкъланнганды.

Тютюн эм никотини болгъан продукция бла байламлы быллай бузукълукъла этиледиле: товарны QR-кодунда ол эртте окъуна сатылгъанча   чыгъады. Болсада тюкенде товаргъа аллай зат  келишмейди.  Дагъыда тюкенде сатыучу къагъытда жазылгъан инсандан башха болуп чыгъады. Аллай эмда башха шартла товарны законсуз сатылгъаныны белгисидиле.

Контроль-надзор бардырыу жаны бла къарауну  кезиуюнде 25 бузукълукъ тинтилгенди. Ала административ жууапха тарылгъандыла эм 36 минг сом тазир тёлерге тюшерикдиле. 

Тютюн эм никотини болгъан продукция маркировкасыз сатылгъаны билинсе, аны юсюнден Роспотребнадзорну бёлюмюне айтылыргъа керекди. Аны адреси: Нальчик шахар, Кешоков  атлы орам 96-чы номерли юй. Электрон адреси - 07.rospotrebnadzor.ru.

Эсге сала айтсакъ, «Ветеринарияны юсюнден» федерал законнга тийишлиликде биринчи мартдан башлап маллагъа бла юй къанатлылагъа да борчлу халда белгиле  этерча закон къабыл этилгенди. 

Проектни чеклеринде предприятияла, энчи иеликле, арбазла эм маданият-заман кечиндириу учреждениялада тууарлагъа, атлагъа, тюелеге хар баш сайын маркировка этдирирге керек боллукъду. Къойлагъа, эчкилеге, тауукълагъа, къазлагъа, бал чибинлеге уа маркировка къауум халда этиледи.  

Аны хакъсыз этдирир онг барды. Болсада белгилеуню  хар ким кеси ыразы кёргенин сайларгъа эркинди.

Экспертле айтханларыча, энчи белги салыуну  бардырыу малланы тюз санын билирге эм  къоркъуусуз аш-сууну  да жалчытыргъа онг берликди.