Къоркъуусузлукъну жалчытырча

Россейни МЧС-ини радиация, химия эм биология къоркъуусузлукъну жалчытыугъа жууаплы къуллукъчуларыны битеуроссей жыйылыулары болгъанды. Анга ведомствону ара аппаратындан эм жер-жерли бёлюмлеринден 120-дан аслам адам къатышханды, ол санда Къабарты-Малкъарда управлениядан къыйын болумланы тыйыу жаны бла баш специалист Константин Кротков да.

Жыйылыуну министр Александр Куренков ачханды. «Арт жыллада радиация, химия эм биология къоркъуусузлукъну жалчытыу бёлюмле кёп жумуш тамамлагъандыла, ковидни кезиуюнде ишлегендиле, Херсон, Оренбург, Курган, Тюмень областьлада суула кётюрюлгенлеринден сора дезинфекцияны бардыргъандыла, химия промышленностьну чыгъаргъан предприятияла салгъан хатаны кетериуге къыйын салгъандыла, уллу къырал эм халкъла аралы мероприятияланы ётдюрюуде къоркъуусузлукъну жалчытыугъа къатышхандыла. Сизни усталыгъыгъыз салыннган борчланы тынгылы тамамлауну мурдоруду», - дегенди ол.

Ызы бла жыйылгъанланы штатдан тышында авария-къутхарыу къуралыуланы хазырлауну жангы амаллары бла шагъырейлендиргендиле, химия эм радиация къоркъуу болгъан объектледе ишлеуде юйрениуле къалай ётгенлерин, уулу веществоланы зараны жетгенлеге медицина болушлукъ къалай этилгенин кёргюзтгендиле, деп билдиредиле ведомствону регионда Баш управлениясыны пресс-службасындан.