Иш кёллюлюклери ючюн ыспас таба

Бюгюнлюкде Жангы Малкъарда социал магъаналы объектле ишленнгенлери неда жууукъ заманда къурулушлары башланырча проектде болгъанлары бизни бек къууандыргъанды. Элни амбулаториясы да жангыртылыргъа тийишлиледен бириди. Анда баш врач болуп Мырзабекланы Любовь ишлейди.

Ол Жангы Малкъарда туугъанды. Къабарты-Малкъар къырал университетни медицина бёлюмюн бошагъандан сора, 2005 жылда интернатурада билимин ёсдюргенди. Ызы бла нефрология жаны бла сынамын кючлер муратда Москвада С.П.Боткин атлы клиника больницада ишлегенди.

Туугъан элинде биринчи болушлукъ берген медицина учреждение жетишимли ишлерине врач-нефролог Любовь Сейфуллаевна уллу къыйын салгъанды. Амбулаториягъа башчылыкъ этгенли онтёрт жыл чакълы болады. Аны бла бирге юйюр врачны борчун да сылтаусуз толтурады.

Биз ушакъ этген кезиуню ичинде саусузланы келгенлери тохтамады, докторну ишчи телефону да терк-терк сёлешгенлей турду. «Кечгинлик, сёлешмей болмайма», - деп, соруулагъа жууап берди. Келгенлеге да баш врач, медсестрала да ышарып тюбейдиле. Андан башха уа къалай? Бир элде жашасанг!

Къоншу эм тийре да хурмет этгенлерин тыш адам да эслемей къоймазчады. Аллай кезиуде къалай игиди бир тюрлю усталыкъ алып, ахлуларынга керек болгъанынг, деген акъыл келеди. Бютюнда врач усталыкъ уллу шахарда, гитче элчикде да бирча даражалыды.

Мекямны тышы артыкъ омакъ тюйюл эсе да, ичине кирсенг, сюртюлюп-боялып эмда болмагъанча тазады. Бирси элледеча, мында да, саусузланы асламысы къан басымлары кётюрюлюп, жюреклери бла къан тамырлары, бауурлары, бюйреклери, бронхалары, ёпкелери ауругъанладыла. Алагъа, башхалагъа да мында биринчи болушлукъ бериледи. Керек болса уа, УЗИ-ге, рентгеннге да районла аралы больницагъа ашырыладыла. Стационарда кюндюз жатхан саусузлагъа багъарча беш жер барды.

- Эл узакъда болгъанлыкъгъа, кадрла жетедиле. Ол санда эки медсестра, фельдшер, санитарка эм водитель ишлейдиле. Бюгюнлюкде ишибизге чырмагъан бир тюрлю жарсыу жокъду. Былтыр жылны ахырында женгил машина бергендиле. Бизге ол бек жарап турады. Районла аралы больница дарманла эмда башха затла бла да толу жалчытады. Керек болгъан сагъатда терк болушлукъ берген машинаны Урожайное элден чакъырабыз. Ара болницагъа неда Нальчикге тапдырыргъа керекли саусузларыбыз кёп болмагъаны себепли, ол эки элге да жетишип турады, - деп къошханды Любовь Сейфуллаевна.

Амбулаторияда процедурала этген, физиотерапия бёлюмле да бардыла. Эллилени иги кесеги электрофорезге сюйюп жюрюйдюле. Аны бла бирге жюреклери къыйнагъанлагъа да къарарча электрокардиография (ЭКГ) аппарат да барды.

- Бусагъатда абаданладан 853-сю эм сабийледен 246-сы бизде эсепдедиле. Сакъат сабийле беш бардыла, болсада къыйын ауругъанланы саны 356-гъа жетеди. Диспансеризацияны юсюнден айтханда, эки жыйырма жылдан таматала – жыл сайын, андан гитчеле уа юч жылгъа бир кере саулукъларына къаратыргъа борчлудула. Аллай амалны хайыры бла кёп къыйын ауруу башлана тургъан кезиулеринде ачыкъланадыла, ол санда онкология да. Анализлерин жаратмасакъ, башха специалистле толуракъ тинтирча ара больницагъа жиберебиз. Анда тийишли специалистледен сора да, шёндюгю оборудование да барды. Жылгъа бир кере жай кезиуледе улоуну мурдорунда ишленнген флюорография келеди. Бизнича узакъ элге ол да ахшы себепликди, - дейди ушакъ нёгерибиз.

Ол саулукъ сакълауда жыйырма жыл чакълы ишлейди, аны себепли бёлюмню айнытыугъа уллу къошумчулугъу ючюн ведомствону атындан сыйлы грамоталагъа, Ыразылыкъ къагъытлагъа да тийишли болгъанды. Ол санда «Коронавирус жукъгъан ауруудан къорууларгъа энчи къыйын салгъаны ючюн» майдал эм башха саугъала бла белгиленнгенди. Любовь Сейфуллаевна кёп сабийли ана болгъанын билгенибизде, юйюрню юсюнден да сормай болмадыкъ. Ол баш иеси Мырзабекланы Борисни жашы Хаким бла юч жаш бла бир къыз ёсдюредиле. Муслим, Милана, Къайсын эм Сулейман да алыкъа школда окъуйдула. Хаким сабанчылыкъ эм малчылыкъ бла кюрешеди. Элде иш кёллю, мадарымлы жашладан бириди.