Окъутуудан сора да, сабийлени адетли, низамлы болурларын сюеди

Кетенчиланы Мустафаны къызы Людмила Тёбен Чегемде туугъанды. Къабарты-Малкъар къырал университетни педагогика бёлюмюн 1995 жылда тауусуп, ызы бла туугъан элини орта школунда устаз болуп урунады. Соцпедагог, къошакъ билим берген устаз болуп кёп жылланы ишлегенди. Бюгюнлюкде уа башланнган классланы устазы болуп, къарыуун, кючюн сабийледен аямай кюрешеди.

Людмила биринчи ишлеп башлагъан жылларында жаш адам болуп кёп тюрлю байрамла, конкурсла, къууанчлы жыйылыула, ачыкъ дерсле къурап тургъанды. Кёп тёлюню эсинде болурла, баям, ол ахшы ишле.

Бюгюнлюкде гитче классланы окъутуу да бийик даражада барады. Ол сабийлеге кёлюн, жюрегин, жанын берип алай ишлейди. Хар окъуучугъа кесини къыйынын энчи салады.

Орус тил, математика, шатык окъуу, ана тил, малкъар тил, табийгъат билим, музыка, сурат ишлеу, технология – бу дерслени барын да сохталарына кюн сайын бергенлей турады. Аны къой, къылыкъгъа, адетге, низамгъа энчи эс бурады. Ол а тюздю. Бир-бир ата-анала бусагъатда сюймейдиле сабийлерине тырман этгенни. Устаз тырман эте эсе уа, билип этеди, иги болурун сюеди.

Ишге къаты болгъан устазлагъа уллу хурмет этеме. Ол адепли, намыслы адамды. Аны жюрегин къачан да жарыкъ этген – сабийлеге керек болгъаныды.

Людмила Мустафаевна бу школда уруннган кёп башха устазлача, бу окъуу юй сабийлени экинчи ата юйлерича, аланы андан да иги, билимли болургъа, къыйынлыкъда болушлукъ этерге, къууанчда къууаныргъа айланнган жер болурун сюеди. Алай болур ючюн а кёп кючюн салады. Баям, мен аны ёхтемленип айтама, нек дегенде ол мени да окъутханды. Бизни заманыбызда уллу класслагъа ётюп андан кетгенибизде, кёп окъуучу тенглерим жилягъан окъуна эте эдиле. Сабийле Людмила Мустафаевнаны не заманда да бек сюйгендиле. Кесин алай сюйдюре билген керти устаз болгъанны бир ышаныды.

Жашауну иги жанына тюрлендирирге итинеди, битеу кючюн, билимин, сынамын да аямай сюйген ишине береди.

Кёп жылланы школну директору болуп, бюгюнлюкде устаз, РФ-ни окъутуу ишини сыйлы ишчиси Байтуугъанланы Мусабий Ахматович кёп жылланы къолунда ишлеп, бюгюнлюкде биргесине уруннган Людмиланы юсюнден былай айтады: «Кесини билимин ёсдюргенин тохтатмайды. Анда окъугъан сабийле бек адеплиледиле. Алагъа барыбыз да сукъланабыз. Окъутуу ишде жангы чурумлагъа терк юйренеди, сохталарын да юйретеди. Ишин тынгылы бардырады».

Кетенчиланы Людмила бир заманда кесине махтау излемегенди. Кесини ишин бийик даражада бардыргъан, окъутхан сабийлерине билим, къылыкъ берген анга эм уллу махтауду, ыспасды.