Мирзеуню заманы жете турады

Шимал Кавказда тирлик жыйыу кезиуге хазырланыуну юсюнден кенгеш бу кюнледе бардырылгъанды. Анга РФ-ни эл мюлк министрини орунбасары Андрей Разин, регионланы, Россельхозараны келечилери, КъМР-ни эл мюлк министри Хасан Сижажев да къатышхандыла.

Къуру къыбыла регионлада угъай, саулай къыралда да шёндю тирлик жыйыу къалай баргъаныны юсюнден РФ-ни Эл мюлк министерствосуну битимчилик департаментини башчысы Роман Некрасов билдиргенди. Ызы бла регионланы келечилери да алада болум бла шагъырейлендиргендиле.

Хасан Сижажев айтханнга кёре, быйыл жаз башы сабан ишле заманында эмда тынгылы бардырылып бошалгъандыла. «Сабанланы ёлчеми тюрленмегенди, алгъын жылладача 281,7 минг гектарды. Мирзеулюк битимледен асламысында кюзлюк будай бла арпа ёсдюрюледиле. Тирликни бу кюнледе жыйып башларбыз деп ышанама.

Жашил къудоруну заманы уа жетгенди, консерва заводла да аны жарашдырып башлагъандыла. Эл мюлкде уруннганла таукелдиле, кюн да себеплик этип, иги тирлик жыяргъа къолубуздан келирине ишексизме», - дегенди министр.