Сабийлени насыплы эталгъандыла

Элбрус районну тиширыуларыны советини башламчылыгъы бла районну саулукъларында чекленнген онглары болгъан неда башха къыйын ауруулары болгъан сабийле окъугъан ресурс арада Сабийлени къоруулауну халкъла аралы кюнюн белгилегендиле.

Сабийлеге осуйлукъ этиу бёлюмню бла акъылбалыкъ болмагъанланы ишлерини жаны бла комиссияны келечилери, районну Билим бериу управлениясы бла бирге бу сабийлеге аламат байрам къураргъа болушхандыла. Ала къыйын жашау болумгъа тюшген юйюрлеге тутхучлукъ этер муратда саугъала жарашдырып келтиргендиле.

Ич ишле министерствону район отделыны къырал автоинспекция бёлюмюню таматасыны къуллугъун болжаллы халда толтургъан Жанатайланы Рустам бла  Билим бериу управленияны таматасы Атаккуланы Нюржан сабийле бла  ариу сёлешип, ата-аналаны кёллендирирча сёзле тапхандыла. Бу сабийле аланы жюреклеринде жашагъанларын, алагъа болушлукъ этиуню мындан ары да бардырлыкъларын чертгендиле.

 Араны устазлары сабийле бла бирге кёп тюрлю оюнла ойнагъандыла, жырчыкъла айтхандыла. Алагъа къонакъгъа келген Умка атлы жумушакъ уллу илляу айыу сабийчиклени тепсетип къууанчлы этгенди. Гитчеле арбазда сурат ишлегендиле. Байрамны ахырында уа ата-анала сабийлерини жылны ичинде болдургъан жетишимлерини юсюнден видеороликге къарагъандыла. Жашчыкъланы бла къызчыкъланы къоруулаугъа аталгъан байрам бу арада энчи магъаналы эди. Нек дегенде бу къауум хар жангы адамгъа, жангы саугъагъа да жюрекден къууана билген, кёзбаусуз, таза жанладыла. Аланы къууандырыу башха ведомстволаны ишчилерине да аламат юлгю болур деп ышанабыз.

 Жанатайланы Рустам кесини ишчилери бла бирге араны арбазында, бу сабийлени ойнаучу жерлеринде, аламат сабий къыллауча орнатханды. Къонакъла байрамны бетин чыгъарып, сабийлени насыплы эталгъандыла.