Хыйлачыла уллайгъанланы сайлайдыла

Быйыл 22 мартда Нальчикден 89-жыллыкъ тиширыугъа ол танымагъан биреулен сёлешгенди эмда право низамны къуллукъчусу болгъанын айтханды. Ол хыйлачыла   банк картада болгъанны урларгъа кюрешедиле, аланы тохтатыр ючюн, ахчаны толусунлай алыргъа, битеу сомларны курьер бла анга ашырыргъа керекди, деп алдагъанды.  

Сёлешген ыннагъа банкга барырча такси чакъырып, ахчасын окъуна тёлегенди.   Алай бла тиширыу 434 176 сомну алып, аны барысын да курьерге бергенди. Андан сора уа жалгъан полициячы телефонун ёчюлтюп, тас болуп къалгъанды.

Пенсиячы алданнганын ангылап,  полициягъа тарыкъгъанды. Тийишли излеу-тинтиу жумушла бардырып, ахчаны алыргъа келген тохташдырылгъанды. 21 апрельде Пятигорскда Ставрополь крайны 32-жыллыкъ инсаны тутулгъанды. Ол ыннадан ахчаны алгъанын айтханды. Анга РФ-ни УК-сыны 159-чу статьясыны 3-чю кесегине кёре терслеу материалла ачылгъандыла. Ол быллай башха аманлыкълагъа къатышханы бла къалгъаны тинтиледи.