«Бийик жетишимлени кюню бла алгъышлайма!»

КъМР-ни Башчысы Казбек Коков Къабарты-Малкъарны жамауатын Космонавтиканы кюню бла алгъышлагъанды.

«Бу байрам адамны космосха биринчи кере учханына жораланып тохташдырылгъанды. 1961 жылны 12 апрелинде адам улуну тарыхында биринчи космонавтны - Юрий Алексеевич Гагаринни – аты бир сагъатны ичинде битеу дуниягъа белгили болгъанды.
 

Космосха биринчи кере учуу адам улуну деменгили жетишимлеринден бирине саналады. Аламны бойсундуруу ма андан башланнганды. Ол илмуну бла техниканы айнытыугъа жангы кюч бергенди.

Космонавтиканы айнытыугъа  бизни жерлешибиз, совет эмда россейли алим, Россейни Илмула академиясыны академиги Энейланы Магометни жашы Тимур да уллу къыйын салгъанды. 2023 жылда аны аты сабий чыгъармачылыкъны «Кюн шахар» академиясыны фахмулу сабийлени  ачыкълау эмда айнытыу жаны бла «Антарес» арасына аталгъанды. Анга жюрюген жашчыкъла бла къызчыкъла бюгюнлюкде хар жаны бла да айырмалы болургъа итинедиле, битеуроссей конкурслада уллу жетишимле болдурадыла.

Багъалы шуёхларым, Космонавтиканы кюню бла, бийик жетишимлени кюню бла алгъышлайма!»,- деп айтылады регионну Башчысыны алгъышлау сёзюнде.