Фонтан а майданнга къууат къошарыкъды

Тырныауузда жангыртыу ишледен сора  Первооткрывательлени майданы кёз къууанырча  омакъ болгъанды. Анда шинтикле орнатхандыла, бордюрла бла тротуар плитка салгъандыла эм тёгерек-башны жашиллендиргендиле. Кёп болмай а чыракъла бла жарытылгъан фонтанны сынау халда жиберип кёргендиле. Толу кючю бла ол жылыу келгенлей ишлеп башларыкъды.   
Майданны айбатландырыу иш  «Единая Россия» партияны  «Шахарда болумну игилендириу» деген проектини чеклеринде бардырылгъанды. Анга къырал бюджетден юч миллион сомдан аслам бёлюннгенди.
Энчи бу объектде ремонт этилирин шахарчыла къол кётюрюп сайлагъандыла. Жууукъ кезиуледе аны къууанчлы халда ачар мурат этиледи. Энди ол жамауат солургъа сюйген жерледен бири боллукъду.