Аналыкъ капиталны аманлыкъчыладан сакъларча

Россейни Социал фондуну Къабарты-Малкъарда бёлюмюнден билдиргенлерича, республикада юйюрле аналыкъ капиталны кёбюсюнде жашау-турмуш болумланы игилендириуге, жангы фатар алыугъа, ол муратла бла алыннган кредитлени тёлеуге хайырланадыла. Аны бла байламлы интернетде эм социал сетьледе ишеклик туудургъан билдириуле чыгъа турадыла. Хыйлачыла ата-аналагъа юй неда фатар алгъанда юридический жаны бла болушургъа, аны ючюн капиталдан ахчаны алыргъа, сертификатха иеликни башха инсаннга ышаныуда себеплик этерге айтадыла.

  Алай капиталны законда белгиленнген муратладан башхасына хайырланыу, ол санда андан жашыртын ахчаны алыу уголовный жууаплылыкъгъа келтирликди. Ол эм уллу ёлчемледе аманлыкъчылыкъгъа саналады. Кодексге тийишлиликде сертификатны иелери да хыйлачылагъа къошумчулукъ этген халда жууапха тартыллыкъдыла. 

 Юйюр сертификатны фатар алыргъа хайырланыргъа дей эсе, бу шартлагъа эс бурургъа керекди:

 - организацияны уставында инсанлагъа кредит берирге эркинлиги болгъанына бла къалгъанына къараргъа;

 - кредитни алыуну эм аны тёлеуню жорукълары, бу жумушну толтурууну багъасы да келишимде жазылыргъа керекдиле;

- кредит ахча  сизни счётугъузгъа жиберилирге керекди, алай фатарны алыу бла байламны келишимни тауусхунчу ол ахчагъа тийилмейди. Ахча жангыз да журтну багъасын тёлегенде хайырланылады.

Фондда юйретгенлерича, эм игиси жашау этип башларгъа жараулу, санитар излемлеге келишген фатарны сайлауду, андан сора да, заявленияны эс салып толтурургъа, документлени фондха инсан кеси элтирге, къырал жумушланы порталы бла хайырланыргъа тийишлиди. Танымагъан адамладан болушлукъ излемезге керекди.

   Фондну республикада бёлюмюню башчысы Николай Баков эсгертгенича, 1 февральдан башлап аналыкъ капитал 7,4 процентге кёбейтилгенди, биринчи сабийге аны ёлчеми 630,4 мингди, экинчиге уа – 833 минг. Биринчи балагъа берилген сертификатны алгъан ата-аналагъа дагъыда сабий тууса, 202,6 минг сом тёленеди.

Аналыкъ капиталны программасы ишлеп башлагъанлы Къабарты-Малкъарда 91 324 сертификат берилгенди, аны ючюн 17,7 миллиард сом бёлюннгенди.