КъМР-де адамла аслам жыйылгъан мероприятияла болжаллы халда бардырыллыкъ тюйюлдюле

 «Къабарты-Малкъарда жашагъан журметли жамауат! Подмосковьеде болгъан бушуулу ишле бла байламлы республикада адамла аслам жыйылгъан тюрлю-тюрлю мероприятияланы болжаллы халда тохтатыргъа деген оноуну этгенме», - деп белгилегенди Казбек Коков.

Республиканы Башчысы дагъыда былай къошханды, Къабарты-Малкъарда хал тынчды эмда хар затда контрольда турады. Аны бла бирге социал учреждениялада, жашау магъаналы болгъан тюрлю-тюрлю мекямлада, адамла аслам жыйылгъан жерледе тийишлисича къоркъуусузлукъну мадарлары этиледиле.

Казбек Коков мында жашагъанлагъа эм республикагъа къонакъгъа келип тургъанлагъа эсли болургъа чакъыргъанды, транспортда эмда башха жерледе бош атылып тургъан затланы, танымагъан эм иги ышанмагъан адамланы юсюнден право сакълаучу органланы келечилерине билдирирге кереклисини юсюнден айтханды.