Хайырлы байламлыкъла

Кёп болмай Дмитриий Рогачев атлы Сабий гематология, онкология эм иммунология миллет медицина тинтиу араны специалистлери Нальчикде болгъандыла. Къонакъла эм биринчи Республикалы сабий кёп профильли клиника араны жокълагъандыла.  Аны кезиуюнде службаны иши бла шагъырейленнгендиле-гематология бла онкология саусузлагъа къалай багъылгъанына эс бургъандыла.

 Андан сора да, Къан къуйгъан арада болуп, къанны эм компонентлерин хазырлаугъа эс бургъандыла. Клиника, иммунногематология, молекуляр-биология тинлиуле бардыргъан лабораторияланы ишлерине багъа бичгендиле. 
Илму-излем араны таматасы Галина Новичкова КъМР-ни саулукъ сакълау министри Рустам Калибатов бла тюбешиуюнде онкогематология бла байламлы аурууладан къыйналгъан сабийлеге тынгылы бакъгъанларына ыспас этгенди. Андан сора да, жангырыту ишлени хайыры бла РДКМЦ-ни ишин игилендирирге онг табылгъанын, жангы хирургия корпус да бийик класслы диагностика оборудование бла жалчытылыннганын чертгенди.

Къонакъ Къабарты-Малкъарда коллегаларына ауур саусузлагъа болушлукъ тапдырырча телемедицина амал бла эсгертиуле бергенлерин эм бек онгсузланы уа федерал арада багъарча онг тапдыргъанларын да билдиргенди. Ахырында эки жаны да мындан арысында да байламлыкъны кючлерге келишгендиле.