Жангы жылгъа мекямларын ким ариу жасарыкъды?

Нальчик шахарны мэриясы, Жангы жылны байрамын хазырлана, юйлени тышларын бек ариу жасагъан предпринимательлени араларында конкурс бардырады. Аны чеклеринде тюкенлени, кафелени, ресторанланы, салонланы тышларына бла витриналарына багъа берилликди. Аланы башхаладан эсе тап, ариу къурагъанла уа энчи саугъалагъа тийишли боллукъдула.
Шахарны администрациясындан билдиргенлерине кёре, биринчи жерни алгъаннга, аны ишини юсюнден видеоролик шахарда орналгъан медиаэкранладан биринде эки айны ичинде хакъсыз кёргюзтюлюп турлукъду. Экинчи жерни алгъаннга аллай амал бир айгъа берилликди, ючюнчюге уа – эки ыйыкъгъа. Аланы барына да реклама макет хакъсыз жарашдырыллыкъды. Конкурсну эсеплери уа 18 январьда чыгъарыллыкъдыла.