Ветеринар препаратланы жалгъан тюрлюлери

Ветеринар аптекалада эмда малланы багъыуда хайырланылгъан препаратланы сатыу жерледе Россельхознадзорну Къабарты-Малкъарда эмда Шимал Осетияда Управлениясы контроль ишни дайым бардыргъанлай турады. Аны чеклеринде, бу айны ичинде ведомствону келечилери талай дарманны жалгъан тюрлюлерин тапхандыла. Управлениядан билдиргенлерине кёре, ала ма быладыла:

1. «Мазь камфорная-Вет» (сериясы: 22, хайырланыу болжалы: 2020 ж. август). «Торговый дом «БиАгро» ООО. Владимир ш. Ведомствону Коми Республикада бёлюмюню лабораториясында этилген тинтиуге кёре, бу препаратны къурамында камфора деген затны ёлчеми белгиленнген мардагъа келишмейди;

2. «Споровит (къургъакъ)» (сериясы: 93, хайырланыу болжалы: 2021 ж., май). Анда Bacillussubtilis бактерияланы саны мардасындан азды;

3. «Окситоцин 10 ЕД» (сериялары: 030718, 070318. Хайырланыу болжаллары: 2020 ж., июль эм март). «БиоФармГарант» ООО, Владимир ш. Былада хлоргекседин деген заты жетишмегени тохташдырылгъанды;

4. «Диастоп» (сериясы: 391118, хайырланыу болжалы: 2021 ж., ноябрь).  «Агрофарм» ООО, Воронеж ш.;

5. «ФерранималR-75» (сериясы: 000549, хайырланыу болжалы: 2020 ж. июль). Фирма «А-БИО» Москва область;

6. «Витаминно-аминокислотный комплекс «Витам» (сериясы: 1350918, хайырланыу болжалы: 2020 ж., сентябрь). «Биоветсервис» ООО, Томск область.

Бу дарманланы (кёргюзтюлген серияларын) сатыуда тюбесегиз, управлениягъа бу телефон номерле бла сёлешип билдиригиз: 8 (8662) 77-82-49, 8 (8672) 70-05-91 неда электрон почтасына жазыгъыз: rosselxozKBR@mail.ru.

Аны бла бирге алгъа быллай чеклениуге тюшген талай препаратны жангыдан сатып башларгъа (ведомствону буйругъу толтурулгъандан сора) эркинлик берилгенди. Аланы тизмесине ма была киредиле: «Левамизол 75», «Кальция хлорид 10% раствор для инъекций», «Глюкоза 40% раствор для инъекций», «Мазь цинковая 10%», «ДитримRпорошок», «Окситетрациклина гидрохлорид для инъекций».