Спорт бла кюреширге аламат онгла

Ахыр беш жылны ичинде Къабарты-Малкъарда онтёрт спорт объект (39 минг квадрат метр) ишленнгенди, деп айтылады республиканы Правительствосуну порталында билдириуде. Шёндюгю пятиборье бла кюреширге онг берген жангы комплекс бизни республикада биринчи кере къуралгъанды. Анда 50 метрлик бассейн барды. Сюзерге келгенлеге алты жолчукъ эмда суугъа секирирча трамплинле жарашдырылгъандыла, 192 къараучугъа да жерле бардыла. Бу мекямда дагъыда универсальный спорт зал ачылгъанды. Анда 242 къараучугъа трибуна ишлегендиле. Дагъыда тренажёр эмда гимнастика залла, тир да барды.

Буз къаланы къурулушу да андан ары барады. Быллай объект республикада бир да болмагъанды. Ол 3700 квадрат метрни алады. Аренасында жюз чакълы спортчугъа бла юч жюзден артыкъ къараучугъа жерле боллукъдула. Анда спортну хоккей, кёрлинг, бузда учуу дегенча аллай тюрлюлери бла кюреширге боллукъду. Къаланы къурулушу «Демография» миллет проектни чеклеринде бардырылады.

Мухолну кёпюрю жангыртылады

Черек районда бир кёпюрге тынгылы ремонт этиле турады. Сёз Огъары Малкъарны бла Мухолну арасында объектни юсюнден барады, деп айтылады КъМР-ни Транспорт эмда жол мюлк министерствосуну сайтында.

Кёпюрню узунлугъу отуз метрге жетеди. Бу ишлени кезиуюнде аны эки кереге кенг этерге дейдиле. Специалистле дагъыда аны мурдорун кючлендирликдиле, сууну эки жанында хуналаны да, бетон къуюп, тынгылы эте турадыла. Ызы бла жолун, тротуарларын жарашдырлыкъдыла, буруула ишлерикдиле эмда чыракъла орнатырыкъдыла. Кёпюрде ишле «Къоркъуусузлу тынгылы жолла» миллет проектни хайырындан бардырыладыла. Аланы барын да быйыл жаз башында тамам этерикдиле.

Эсигизге салайыкъ: Россей Федерацияны Президенти Владимир Путинни оноуу бла къуралгъан миллет проектле 2019 жылда ишлеп башлагъандыла.

Онюч школ жангыртыллыкъды

Быйыл бизни республикада энтта да онюч орта школда тынгылы жангыртыу ишле бардырыллыкъдыла, деп билдиргендиле КъМР-ни Жарыкъландырыу эмда илму министерствосундан. Сагъынылгъан объектледен алтысында ишле бары да быйыл тамам этилликдиле, къалгъанларында уа келир жылгъа дери созуллукъдула. Саулай да Лескен, Басхан, Элбрус, Черек эмда Прохладна районлада, Нальчикде бла Прохладныйде мектепле, сора министерствону бойсунууунда болгъан эки учреждение жангыртыллыкъдыла.