Аскерчиле саусузлагъа аягъы юсюне болургъа болушадыла

Росгвардияны КъМР-де Управлениясыны 68 келечиси бла Звездный посёлкада аскер бёлюмню 158 къуллукъчусу, «Къанны службасы» къырал программаны чеклеринде бардырылгъан  донорлукъ акциягъа къатышып, саусузлагъа болушхандыла. Аны Лермонтов шахардан «Федерал медико-биология агентствону Шимал-Кавказ илму-клиника арасы» къурагъанды.
Управленияны  башчысы полицияны полковниги Сергей Васильев офицерле бла сержантла быллай     жандаруурлукъ ишлеге тири къатышханларын белгилегенди. Аны айтханына кёре, Росгвардияны республикада бёлюмюнде 4 сыйлы донор къуллукъ этеди, энтта 20 аскерчи уа саусузлагъа къанларын дайым да бередиле.  
- Бу иш къуру медицина бла магъаналы тюйюлдю, аны адамлыкъ ышанлары уллудула. Ол инсанларыбызны жашаулары, саулукълары бла байламлыды. Право низамны сакълаучула уа къоркъуу болумда къуллукъ этедиле.  Ма аны ючюн биз бюгюн былайдабыз,-дегенди Управленияны медицина жаны бла жалчытыу къауумуну башчысы полицияны майору Аппайланы Магомет.
Врачланы айтханларына кёре, къанны алышаллыкъ зат жокъду, ол саусузгъа операцияны кезиуюнде,  бакъгъанда да артыкъда керекди. Жарсыугъа, къыралны саулукъ сакълау учрежденияларында уа ол жетишмейди.
 Акцияны бардыргъанладан бири Анна Телунц, Шимал-Кавказ илму-клиника араны башчысыны орунбасары, Росгвардия бла байламлыкъла эрттеден жюрютюлгенлерин белгилегенди. Сёз ючюн, Пятигорскде быллай жумушха 150 аскерчи къатышханды. «КъМР-де Управленияны оноучуларына, келечилерине да сансызлыкъ этмегенлери ючюн ыразылыгъымы билдирирге сюеме. Быллай саулукълу адамланы къанлары кёплеге аягъы юсюне болургъа болушурукъду»,-дегенди ол.