Таучуну бай къатыныЧам хапар - Алло, алалы Таучуну кёрмегенмисе, тюнене деп бери излейме, тапмайма? - Тейри, Жамбер, ол къарындашыбызны кёрмегенли айдан аслам болады. Нухну дууасында да эслемедим аны. Бир хата болуп къалмагъы эди? - Анса уа, тап аууз ачарса, не боллукъду Таучугъа! Юч-тёрт кюн мындан алгъа бир тиширыу бла Минги тауну тийресиндеги кафеледен биринде олтуруп тургъанын кёргенме. Бир аш къангада олтургъанын кёрдюм да, экибиз юйдегили болгъанда, аллай ашарыкъла болсала, ол къууанчны хапарын бюгюн да айтып турур эдиле. Ол тиширыу бек омакъ, юсю, башы да тап, омакъ машинасы. Бизни къарындашыбыз да жангы кийимледе. Тюз заводдан кёп болмай чыкъгъан темир онсомлукъ кибик жылтырай эди. Кертисин айтханда, Таучуну былай омакъ тиширыу бла бирге, юсюне тап жарашхан, ол дуния башында жангыз биреуленнге тигилген костюмлада кёрдюм. - Энди былайда уа асыры семиртдинг. Ол джинса кийимлерин тешгенине уа къууандым. Бизни жыл санда былай кийиннген келишмейди дегенни айта туруучу эдим. Кёремисе аны, мени айтханыма сыйынмай, бир быстырбашха тюбегенлей а, тешиннген, кийиннген да эте айланнганын. - Таучу, энди сенича бернеден тюшген костюмлада айланмазлыгъын ангылатдым. Бу оруслу къатынны Перьм шахарда бир кибик атлары бла алты тюкени барды. Бизни къарындашыбызгъа машина алыргъа Бештаугъа, Нарсанагъа да элтип айланнганын Таучу кеси айтып билдим. - Сора уа, къаллай машина алды? Жауун да кёлге жауады дегенлей, кёремисе аны онгуп къалгъанын, - деди Жандаур, сукъланнганын да жашырмай. Жандауур бу орам хапаргъа ийнаннганын ангылагъан Жамбер Таучуну орус къатыныны юсюнден хапарны кюн сайын бардырыучу болуп къалды. Халкъ ётюрюкге быллай бир ийнаныр деб а турмай эдик. Ийнаннган сени болсун, Таучуну бай къатыныны юсюнден билмеген, аны сормагъан жокъ сунарса. Не тойгъа, не бушуугъа барыр онгу болмай къалгъанды бу харипни. Жамбер Таучуну бай къатыны Нарсанада гектар чакълы жерни аны аты бла алып, алайда тюплю-башлы юй ишлетип башлагъанын айтханлы уа, сукъланнганладан эсе, терс къарап ётгенлени саны кёбейгеннге ушайды. Мени жауум да къатынны хайыры бла бай болуп къалсын. Айхай, Таучу да жаннган отха чыракъ суу къуйгъанлай этеди сора уа, эрттеден бери кийинмей тургъан костбмларын кезиулешип кийип турса, бай болгъанына ийнандыла да къалдыла. Бир кюн аллай костюму бла чыкъды да, бир он адамны алгъышын эшитди. Бу барыуунлай барса, депутатха айырлыкълары баямды. Ол кеси жагъаларына келишмегеннге санап тургъанла Таучуну не чурумлары болса да, чакъырмай къоймайдыла. Таза башын суугъа атарыкъ этгендиле кюн сайын да кафеледе сыйланыула. Таучу энди юйюнде ушхууур этип да къыйналмайды. Кийиннгени кюн сайын башхача, ашагъаны да алай. Таулу хычинледен эриксе, Къарачайны, Дюгерни, Дагъыстанны, ол неди Италияны «хычинлеринден» къарнын тойдуруп къояды. Жашха кафеледе тюбегенле муну бай болгъанына бютюн ийнана барадыла. Энди уа бир кёр халкъгъа бу хапар ётюрюк болгъанын ангылатып. Айтыргъа, ангылатыргъа да кюрешгенди. Алай кертиге киши ийннанмай тохтагъанды сора уа. Энди бу ётюрюкге Таучу кеси да йинанган кибикди, бу бай къатын къайда болгъанындан хапары жокъду ансы. Бу хапарны бизге Абу улу Алий ийгенди.
Поделиться:
Читать также:
07.02.2025 - 12:02 →
Элни бети-адетинде
07.02.2025 - 08:30 →
Ата-бабаларыбыз сютден, этден да къаллай тюрлю ашарыкъла хазырлагъандыла
06.02.2025 - 10:11 →
Сабийликден урунуугъа юйрене
06.02.2025 - 07:30 →
Жюреклени бийлеген тауларыбыз
05.02.2025 - 15:11 →
Мадарымлылагъа – тап амал
|