Санаторийледе солуугъа иги кесек ахча бёлюннгенди

Жылны аллындан башлап Россейни Социал фондуну регионда бёлюмю 205 адамны санатор-курорт багъыу бла жалчытханды, аны ючюн 2,3 миллиондан аслам ахча къоратылгъанды.

Республикада эм андан тышында регионлада санаторийлеге къанны жюрюуюнде, эндокринный эм нерва системаларында, солуу органларында эм башха къыйын ауруулары болгъанла жибериледиле. Хакъсыз путёвкала льготниклени бир талай  къауумуна къарагъан адамлагъа да бериледиле. Алагъа жолгъа тёлерге да керек боллукъ тюйюлдю.

Багъыу 18 кюн бардырылады, сакъат сабийлеге аны болжалы 21 кюндю, мыйылары эм жиликлери ауругъан неда бу органлада чыплары болгъан адамланы саулукъларына 24-42 кюн къаралады.

Инсан очередьде къайда болгъанын фондну официал сайтыны -  https://social-insurance.sfr.gov.ru/r07/ «Регионлада жашагъанлагъа билдириуле» деген бёлюмюнде кёраллыкъды. Аны ючюн СНИЛС-ни номерин жазаргъа керек боллукъду.

Эсгертиу: санатор-курорт багъыугъа социал жумушланы (НСУ) алыргъа эркинликлери болгъан адамла бараллыкъдыла. НСУ-ну орунуна ахчаны сайлагъанла, оноуларын тюрлендирирге эркиндиле, аны ючюн алагъа 1 октябрьге  дери къырал жумушланы порталында, МФЦ-да неда фондну клиент службасында заявление жазаргъа керекди. 2024 жылдан башлап ала НСУ-ну кесин алып тебирерикдиле.