Экономика

Юсюбюздеги жылда сабан ишлени бардырыргъа Россельхозбанк агропромышленный ткомплексде уруннганлагъа 958 миллиард сом ёнкюч бергенди. Ол кёрюмдю озгъан жылны бу кезиую бла тенглешдиргенде 3,4 процентге кёпдю, деп билдиреди финанс учрежденияны Къабарты-Малкъар Республикада бёлюмю.

ШОС-ха кирген къыралланы регионларыны келечилерини ючюнчю Форуму бу кюнледе Ташкентде ётгенди. Аны ишине Россейни, Къытайны, Индияны, Пакистанны, Къазахстанны, Къыргъызстанны эмда Таджикистанны келечилери къатышхандыла. Къабарты-Малкъардан а Форумгъа регионну Правительствосуну Председателини биринчи орунбасары Муаед Кунижев бла курортла эмда туризм министрни орунбасары Шауаланы Ислам видеоконференция халда къошулгъандыла.

 «Газпром газораспределение Нальчик» компанияны авариялы-диспетчер бёлюмлерине быйылны биринчи жарымында кёп къалмай 4,9 минг заявка келгенди. 

«Телемеханика» предприятие ишин андан ары айныта барады. Тёрели продукциясын чыгъарыу бла чекленип къалмай, анда энди лифтле да жыйып башларгъа оноу этгендиле. Ол умутда Тюркден DERYA ASANSOR компанияны технологияларын эмда лицензиясын хайырланыргъа сюедиле, жууукъ кезиуде аны бла келишим этерге таукелдиле, дегендиле республиканы Промышленность, энергетика эм сатыу-алыу министерствосунда.

Сабанлада пестицидле жайгъан кезиуде ол тийреледе учуп айланнган бал чибинле ууланып къырылыргъа боллукъдула. Бу жаны бла бек уллу къоркъуу барды, дейдиле КъМР-ни Эл мюлк министерствосунда эмда аллай ишлени башлардан алгъа бал батманла тутханлагъа билдирирге чакъырадыла.

Быйылны ахырына дери Россейде он эмда беш сомлукъ къагъыт ахчаланы жангыдан чыгъарып башларгъа сюедиле. Ара Банкда айтханларына кёре, ол тёре къайтса, шёндюгю темир онсомлукъланы чыгъарыугъа къоранчла азайтыллыкъдыла.

КъМР-ни Эл мюлк министерствосундан билдиргенлерича, промышленный халда  кёкшуу ёсдюрген мюлкле, орта эсеп бла алып айтханда, быйыл 2,5-3 процентге аслам тирлик аладыла.

КъМР-ни Промышленность, энергетика эмда сатыу-алыу министерствосунда айтханларына кёре, Черек гитче ГЭС-ни къурулушун бардырыргъа хар неда хазырды. Аны бла специалистле объектлени сюеп башлагъандыла. Эсге сала айтсакъ, станцияны къурулушу былтыр ноябрьде башланнганды. Ол замандан бери алайда жолла ишленнгендиле, электрокюч тартылгъанды, башха жумушла да тамам этилгендиле. Ишчиле мекямланы мурдорларын жарашдырадыла, станцияны деривация каналы боллукъ жерде ётген газ быргъыны да башха жанына кёчюре турадыла.

Бахсан шахар округну тийресинде мюлкледе тирлик жыйыу къыстау барады. Муниципалитетни жер-жерли администрациясында айтханларына кёре, быйыл анда кюзлюкле 2235 гектарны аладыла. Ол санда 1814 гектары аллай будайды, къалгъаны уа арпады. Аланы асламысын ёсдюрюу бла Шогенцуков атлы эл мюлк кооперативде эмда «Заря» ООО-да кюрешедиле.

Нальчикни сют заводу жууукъ заманда жангы къурулушну башларгъа мурат этеди. Ол хайырланыргъа берилсе, предприятияны бир кюннге сют сатып алгъаны бла производство кючю 350 тоннадан 900 тоннагъа дери ёсерикди.