Сют заводну кенгертирге мурат барды

Нальчикни сют заводу жууукъ заманда жангы къурулушну башларгъа мурат этеди. Ол хайырланыргъа берилсе, предприятияны бир кюннге сют сатып алгъаны бла производство кючю 350 тоннадан 900 тоннагъа дери ёсерикди.

Биригиу 1998 жылда къуралгъанды, бюгюнлюкде ол Къабарты-Малкъар Республиканы алчы предприятияларындан бириди. Заводну шёндюгюлю излемлеге келишген ата журтлу эм тыш къыраллы 10 производство цехи барды, алада 800 адам ишлейди.

 Чыгъарылгъан продукция сегиз тюрлю ат бла жибериледи. Аланы ичинде бизни республикада эм хоншу регионлада белгили 200 аслам тюрлю-тюрлю продуктла бардыла. Нальчикни сют заводу чыгъаргъан продукцияны сютю, жауну, сют башны, йогуртну, бишлакъланы, творогну, айранны эм башха затланы Шимал-Кавказ федерал округдан тышында да кёрюрге боллукъду.

Биригиуде этилген ашарыкъланы качествосун игилендириуге уллу эс бурулады. Битеу технология ишлеге тохтаусуз контроль этилгенлей турады, ол санда чий сют келтириучюлени сайлагъандан тебиреп, сютден жарашдырылгъан затла сатылыучу жерлеге жетгинчиге дери.

Заводну ишчилери сют чыгъаргъан фермалагъа айланып, анда сютню къаллай болумлада алгъанларына къарагъанлай турадыла. Ийнеклени тургъан жерлери, санитар мардалагъа келишгенлерине бла келишмегенлерине да уллу эс бурулады. Аллай жорукъланы бузгъан мюлкле бла байламлыкъ жюрютюлмейди, деп чертгенди заводну бёлюмюню таматасы Алексей Ващейкин.

Сют алгъан жангы мекям аны терк эм тийишлисича  жарашдырыргъа онг берликди. Андан сора да жангы ишчи жерле ачыллыкъдыла, чыгъарылгъан продукцияны ассортименти да кёбейтилликди, деп билдиргендиле КъМР-ни Башчысыны бла Правительствосуну пресс-службасындан.

Бизни корр.