«Жангы» он эмда беш сомлукъла

Быйылны ахырына дери Россейде он эмда беш сомлукъ къагъыт ахчаланы жангыдан чыгъарып башларгъа сюедиле. Ара Банкда айтханларына кёре, ол тёре къайтса, шёндюгю темир онсомлукъланы чыгъарыугъа къоранчла азайтыллыкъдыла.

Быллай къагъыт ахчаланы чыгъарыу 2013 жылда тохтагъан эди. Ары дери басмаланнган беш эмда онсомлукъла бюгюнлюкде да жюрюйдюле, алай аланы саны уа бек азды. Не десенг да къолдан къолгъа айланып туруугъа къагъытдан эсе темир чыдамлыракъды.

Алай эсе уа «жангы» ахчала алгъынча терк тозурап къалмазламы? Специалистле айтханларына кёре, шёндю технологияла да башхаракъ болгъандыла. Быллай банкноталаны юслерине лак жагъып, аланы хайырланыу болжалларын эм азындан ючден бирине кёбюрек этер амал барды.

Ол алай болсун. Быллай къагъыт ахчаланы къайтып жангыдан нек чыгъарып башларгъа сюедиле? Сылтауладан бири – темир багъа болгъаныды. Къагъыт ахчаланы чыгъарыу иги да хайырлыды.

Россейни Банкында айтханларына кёре, тюкенле, аптекала, отлукъ къуюучу станцияла бу оноуну дурус кёргендиле. Нек дегенде, темир ахчаланы тутхан, санагъан да къыйынды. Къагъыт а ол жаны бла къайда игиди.

Темир он эмда беш сомлукъланы уа хайырланыудан кетерлик тюйюлдюле. Ала, къагъыт ахчала да бирча жюрюрюкдюле.

Омарланы Мурат хазырлагъанды.
Поделиться: