Аграрийлеге - 400 миллион сом

Агропромышленность комплексге кредитлени беш процентден уллу болмагъан ставка бла бериу себеплик этиу къырал программаны чеклеринде Россельхозбанкны Къабарты-Малкъарда бёлюмю 2017 жылдан башлап аграрийлеге 400 миллион сом ётдюргенди. Ол санда 71 миллион сом инвестицияла халда берилгендиле, деп билдиргендиле финанс учрежденияны пресс-службасындан.

Бу программаны хайыры бла былтыр «Заря» эл мюлк предприятие 70 миллион сом къоллу болгъанды. Андан 46 миллиону инвестициялагъа бёлюннгенди. Бу ахчагъа мюлкде сугъарыучу машинала сатып алгъандыла. Дагъыда 24 миллиондан асламы кезиулю сабан ишлеге къоратылгъанды - отлукъ, урлукъла, минерал семиртгичле сатып алыргъа. Андан сора да, озгъан жыл чекленнген жууаплылыгъы болгъан «Агрооптторг» обществогъа кезиулю сабан ишлени тамамлаугъа 40 миллион сом берилгенди.

Банк сагъынылгъан программа бла байламлы быйыл 350 миллион сомдан асламгъа келишимле къурар умутлуду. Аны бла бирге бёлюмде шёндю 70 миллион сомгъа инвестициялы кредитлеге заявкала берилгендиле.

Саулай алып айтханда, бизни республикада кезиулю сабан ишлени кредитле бла 94 процентге Россельхозбанк жалчытады.

«Ставкасы беш процентден кёп болмагъан льгота кредитлени бизни банк битимчиликни, эт, сют малчылыкъны айнытыугъа эмда продукцияны жарашдырыугъа деп береди. Быллай заявкалагъа бек биринчиден къаралады, аланы сюзюу болжалы да къысхады», - деп чертгенди гитче эмда орта бизнес бла кюрешгенле бла ишлеген бёлюмню таматасы Залим Алоков.