Биригип ишлеу хайырын кёргюзтгенди

Къабарты-Малкъарны Жамауат палатасында Россейни Конституциясына тюрлениуле кийириу бла байламлы болгъан айырыулада жамауат къарау къалай къуралгъаныны эсеплери чыгъарылгъандыла.

Жыйылуну ача, палатаны башчысы Хазратали Бердов бу айырыула къыралыбызны тарыхына кирликлерине ийнаннганын билдиргенди.

- Бир жанындан, Россейни конституция къуралыуу бла байламлы жумуш тамамланнганды, бирси жанындан а, адамланы саулукъларына хата жетмезча битеу мадарла этилгендиле. Чурумла чыгъарча уллу кампания бардырылгъанлыкъгъа, ала тынгылы ётдюрюлгендиле.

Жамауат къараучуланы къаууму муниципалитетледе палаталаны бла советлени, жамауат организацияланы, политика партияланы келечилеринден, къыралны болумуна къайгъыргъан гражданладан къуралгъанды, алай бла къараучуланы борчларын 1370 инсан толтургъандыла. Палата районлада 13 жамауат совет, «Единая Россия», «Граждан платформа», «Справедливая Россия» эм «Партия РОСТА», профсоюзланы биригиулери бла келишимле тауусханды. Алай бла граждан обществону битеу институтлары бла байламлыкъла тохташдырылгъандыла, - дегенди Хазратали Александрович.

Жамауат къараучула битеу участкалада ишлегендиле. Ол шарт а, бек алгъа, айырыула законну чеклеринде, бузукълукъсуз ётгенлерин кёргюзтеди. Республиканы профсоюз организацияланы биригиулерини советини таматасы Фатима Амшокова белгилегенича, къараучула участкалада 25 июньдан 1 июльгъа дери тургъандыла, ала къол кётюрюу чурумсуз барырына, эсепле тюз чыгъарырларына, санитар-эпидемиология излемле толтурурларына эс бургъандыла.

Ара айырыу комиссияны башчысы  Вячеслав Гешев а бу айырыула алгъыннгыладан къыйыныракъ ётгенлерин билдиргенди. Ол да эпидемия бла байламлы болгъанды. Болсада, ала бийик даражада къуралгъандыла, жамауат къараучула анга шагъатлыкъ этгендиле, дегенди ол.

Айырыулада волонтёрла къаллай иш тындыргъанларыны юсюнден «КъМР-де волонтёрствону айнытыуну ресурс арасы» организацияны башчысы Татьяна Алексейчик билдиргенди, палатада коммерциялы болмагъан организацияланы советини башчысыны орунбасары Галина Кярова уа жамауат къараучу болуп къаллай борчланы тамамлагъаныны юсюнден айтханды.

Ахырында Хазратали Бердов жамауат къараугъа къатышханланы барысына да ыразылыгъын билдиргенди. Биригип ишлеуюбюзню хайырындан айырыулагъа кёп адам келгенди, бузукълукъла да чыкъмагъандыла, деп къошханды ол.