Сабанлада иш къазауатды

РФ-ни эл мюлк министри Дмитрий Патрушев бу кюнледе бардыргъан видеоконференцияда къыралда жаз башы сабан ишлени къалай бардырылгъанларыны юсюнден сёлешиннгенди. Анга бар регионланы келечилери, ол санда Къабарты-Малкъарны эл мюлк министри Хасан Сижажев да къатышхандыла, деп билдиргендиле ведомствону пресс-службасындан.

Кенгешде айтылгъаннга кёре, бизни республикада быйыл урлукъ 280 мингден артыкъ гектарда себилликди. Ол кеси да озгъан жылдан бери хазна тюрленмегенди. Хасан Сижажев билдиргенича, кюзлюкле 58 минг гектарны аладыла, алагъа да бек тынгылы къаралады. Специалистле фитосанитария болумну контрольда тутадыла, семиртгичле бла багъыу ишни да болжалына салмай тындырадыла.

Жазлыкъланы себиу да бек тири барады. Бу кюнлеге 84 минг гектарда иш тамам этилгенди. Аграрийле урлукъ бла толусунлай жалчытылыныпдыла. Аладан быйыл битеу да 10,7 минг тонна керек эди да, мюлкледе 14 минг тоннадан артыкъ окъуна къыстырыкъ этилгенди. Бу материалны асламысы бизни къыралда чыгъарылгъанды.

Эл мюлк товарла чыгъарыучула техника бла тынгылы жалчытылыннганларын, минерал семиртгичледен, отлукъдан, техника керекледен да къыстырыкъ этилгенин белгилегенди Хасан Сижажев. Аны бла урлукъ себиу иш заманында, кеси да чурумсуз бошаллыгъына ышаннганын чертгенди.

Саулай къыралны юсюнден айтханда уа, урлукъ себиу шёндю 40 регионда барады. Аграрийле 6,2 миллион гектарда ишни бошагъандыла.