Бизнесни жашырынлыкъларына тюшюне

«Иш кёллю Россей» организацияны жаш тёлюге деп къуралгъан бизнес-школунда маркетинг, реклама, товарла сатыу эмда жумушла бериу бла байламлы дерсле ётгендиле. Тренинглени сынамлы бизнес-тренер Наталья  Костенко бардыргъанды, деп билдиргендиле организацияны бизни республикада бёлюмюнден.

Жаш адамла бизнес бла байламлы башламчылыкъларын туура этгендиле, кеслерини хунерликлерин кёргюзтгендиле, башхала къалай сёлешгенлерине, материалларын ачыкълай билгенлерине да багъа бергендиле. Нетворкинг деген амал бла клиентле, инвесторла, иги ишчиле табаргъа юйреннгендиле. Дагъыда аланы товарларын неда жумушларын кимлеге сатаргъа неда берирге боллугъуна тюшюннгендиле, аны, къауумлагъа бёлюнюп, сынам халда хайырланып кёргендиле.

Тренингни экинчи кезиуюнде студентле къыйматлы сатыу этиуню жашырынлыкълары бла шагъырейленнгендиле. Алыучугъа не зат керек болгъанын, анга алыр затын нечик кёргюзтюрге кереклисин, артда ыразы болмай къалгъанла бла къалай ишлерге боллугъун билгендиле.  
- Бу жол дерслеге алгъа итиннген, иш кёллю жаш адамла къатышхандыла.  Аладан бирлери бизнес не болгъанын билир умутда келгендиле, башхала уа башламчылыкъларын толтурур амалланы излеп, - деп белгилегенди Наталья Костенко.