Жамауат ишни эм башха салып

Теммоланы Музафар Кичибалыкъны жер-жерли самоуправления советини депутаты болуп ишлегенли отуз жылдан атлагъанды. Эллиле аны алты кере бир-бири ызындан башда сагъынылгъан ишни бардыр деп, ырзылыкъларын берип сайлагъандыла. Бир да болмагъанча тири адамды, бир ишден да артха турмайды, жамауат борчун ол къадар жылны ичинде шарайыпсыз толтурады. Аны алайлыгъын ушакъ бардыргъанда ангылагъан эдик, сыфаты да айтып турады.

Музафар элде суу быргъыланы бир жери тешилсе, аланы жамаргъа тири къатышады.   Жайда Кичибалыкъда заранлы хансла кёп боладыла, аланы къурутургъа керек дарманланы  мажарады,  чалыргъа керек болса,  эллилени да къурап тамамлайды ол ишни. Теммо улу элни ара мюлкюню  кёп жеринде уруннганды, администрацияны таматасыны къуллугъун толтуруп да жылгъа жууукъ ишлегенди, хар затха юйреннгенди, жашауунда уллу сынау да алгъанды.

Элни совхозунда уа он классны бошагъанлай, урунуп башлагъанды. Майкопну автодорожный техникумун заочно бошагъандан сора, ара мюлкде жерчилик жаны бла баш инженер болуп тургъанды. Аты кёп жерлеге иги бла айтылгъан совхоз 2007 ишин тохтатады,   уллу мюлкю алай  чачылгъанына Музафар  бюгюн да  кечалмайды.  

Шёндю уа  эл администрацияны  жумушланы тамамларгъа кесини энчи техникасы болмагъаны Теммо улуну бек жарсытады. Керек заманда элли жашла  кеси техникалары бла чыгъып, тюрлю-тюрлю жумушланы тамамлагъанларын чертгенди, ол алагъа ыразылыгъын да билдиргенди. Сёз ючюн, Башийланы Аскер трактору бла элге суу быргъыланы тартханда, уллу болушлукъ этгенди. Ёлмезланы Марат машинасы бла зыгъыр ташып тургъанды. Богъатырланы Аскер, къышда суу быргъыла атылгъанда, аланы жамаргъа уллу кюч салгъанды. Гочаланы Зейтун а быргъыланы салгъанда, аланы бир-бирге жалгъагъан жумушну уста тамамлагъанды.

Музафар кесини депутатлыкъ ишинде элни орамларын, аны тёгерегин тазалыкъда тутууну да баш борчларындан бирине санайды. Бу кюнледе район арадан энчи техника келтирип,  бир ай бла жарымны ичинде элли жашла бла санитар тазалауну бошагъандыла. Ол магъаналы ишге Джаппуланы Тахир, Башийланы Расул, Шериев Азрет-Алий, Ёлмезланы Маммаш, Умарланы Аслан тири къатышхандыла. 

Теммо улу эл администрацияны тюрлю-тюрлю комиссияларыны къауумуна да киреди, анда къаралгъан сорууланы кёбюсю ол къатышмай  тамамланмайды. Башхача айтханда, элде не тюрлю жумуш бар эсе да, ол санда байрам кюнле, неда бир жарсыуу болгъан юйюрге, Музафар билмегенлей, аны себеплиги жетмегенлей, бир зат да этилмейди. Сёз ючюн, пандемияны кезиуюнде аш-азыкъ пакетлени кимге берирге кереклилени тизмесин тохташдырыргъа, аланы иелерине тапдырыргъа окъуна къатышханды.

Белгилерчады, Музафар элни ол къадар жумушун тамамлагъанда, кесине бир заманда да  бир умут излемегенин, айтылды-этилди. Отуз жылны ичинде ол шарт анга жорукъду.

 Музафар юй бийчеси Къутушланы Фатимат бла юч жаш ёсдюргендиле. Алты туудукълары барды.Тамата жашы Мурадин биргесине турады, ортанчысы Магомед юйюрю бла Биринчи Чегемде жашайды,  гитчеси Марат Буденновск шахарда аскер борчун толтурады. Теммо улуну дагъыда тёрт къарындашы барды, ала барысы да юйленип, кеси къыйынлары бла жашагъан, Кичибалыкъда айырмалыгъа саналгъан юйюрледиле.