Аналыкъ капиталны къоратыргъа жарагъан жумушла кенгертилгендиле

РФ-ни Президентини буйругъу бла аналыкъ капиталны хайырланыргъа жарагъан жумушланы тизмеси кенгертилгенди. Энди ахчаны сабий сад, кружокла, секцияла, неда вузда окъутуу ючюн тёлерге боллукъду. Ол санда энчи предприниматель ачхан учрежденияда, аны билим бериуге лицензиясы бар эсе. 

Алай бла аналыкъ капиталны ахчасын сабий садда, энчи иели школда бла къошакъ билим бериу учрежденияда окъутуугъа, репетиторланы жумушларына, неда вузда билим алыугъа, ол кезиуде жашау журт ючюн тёлерге жарайды. Сертификатны къайсы сабийге да къоратыргъа эркин этилгенди, ол берилгеннге юч жыл толгъандан сора. Жаланда окъуугъа кирген кезиуде сабий 25 жылдан тамата болмазгъа тийишлиди.

Къысха айтханда, капиталны сабий саддан башлап, вузгъа дери билим бериу учрежденияны жумушларына тёлерге эркин этилгенди. Ол санда общежитияда жашагъанда тёлеулеге да. Организация Россейде орналыргъа, аны билим бериу жумушланы толтурургъа лицензиясы болургъа кереклисин да айтырчады.

2023 жылда 1 январьдан аналыкъ капиталны   билим бериу жумушлагъа къоратхан кезиуде, келишим этерге керек тюйюлдю. Алгъын ата-анагъа аны хазырлап, копиясын кёргюзтюрге керек эдиле. Болсада энди бу жумушну РФ-ни Социал фонду бла билим бериу учреждения бирге тамамлайдыла.

Алай бла билим бериу жумушлагъа аналыкъ капиталны ётдюрюр ючюн заявленияны Социальный страхованияны фондуну сайтында, неда Госуслуги порталда берирге боллукъду, МФЦ-ла да толтурадыла бу ишни.

2023 жылда аналыкъ капитал биринчи сабийге 586,9 минг сомдан аслам болгъанды, экинчисине – 775,6 минг сом.  Быйыл анга 11,9 процентге индексация этилгенди. Ахчаны бир кесеги бла хайырланнган эсе юйюр, аны къалгъаныны ёлчеми кёбейтиледи.