Газ бла байламлы жумушла - смартфонда

«Газпром межрегионгаз Нальчик» компанияны келечилери Нальчикде бёлюмлеринде соруу бардыргъандыла. Ары келгенледен: «Тёлейбиз дегенде компанияны  сервислерине ышанамысыз? Мобильный приложенияны уа жаратамысыз?» - деп соргъандыла.

Компаниядан билдиргенлерине кёре, аны приложениясын бизни республикада 42 минг чакълы инсан хайырланады. Ол а бар абонентлени бешден бири болады. Юйлеринде эсеплеучю прибор орнатылгъанланы юсюнден айтханда уа – ючден бири. Былтыр бла тенглешдиргенде, приложенияны хайырланыучуланы саны тёрт кереге кёбейгенди.

Соруу дагъыда быллай сервисле болгъанын биле туруп, ахчаны алгъынча абонент бёлюмледе тёлегенлени санын кёргюзтгенди. Адамланы ючден бири аны алгъынча кассада берип, къолгъа квитанция алыргъа сюйгенлерин билдиргендиле. Специалистле уа квитанцияны электрон системада жарашдырыргъа боллугъун кёргюзтгендиле, керек болса, ол аны электрон почтагъа жиберлигин да билдиргендиле. Кёплеге уа мобильный телефонларында приложенияны орнатыргъа эмда анда регистрацияны ётерге болушхандыла. Аны барына да жаланда беш минут къорагъанды.

«Абонентле онлайн-сервислени хайырланнганларында къаллай чурумлагъа тюбеучюлерин билирге сюебиз. Соруу бардырып, аны юсюнден ангылау алгъанбыз. Адамла бла хар кюн сайын ишлеген контролёрла алагъа бу жаны бла болушургъа, системагъа ышанырча себеплик этерге боллукъдула. Ол а абонентлени заманларын, къыйынларын да аярыкъды, жумушларын иги да женгил этерикди», - дегенди «Газпром межрегионгаз Нальчик» компанияны башчысы Залим Вороков.

Эсге сала айтсакъ, газ бла жалчытыучу компанияны сайтында (www.mrgkbr.ru) «Энчи кабинет» ачаргъа боллукъду ким да. Аны мобильный приложениясын а смартфоннга орнатыргъа жарайды. Android системада аны аты былайды: «Мой ГАЗ», iOS платформада уа - «Газ- онлайн».