Урлукъ бла жалчытыуну магъанасын жашау кеси кёргюзтгенди

Бизни республика нартюх урлукъ бла кесин толусунлай жалчытады. Тергеулеге кёре былтыр андан онбеш минг тонна чыгъаргъандыла. Къабарты-Малкъарда жаланда 3,5 минг тоннасы хайырланылады, къалгъан кесегин а тыш регионлагъа ашырадыла. Аны юсюнден КъМР-ни эл мюлк министри Хасан Сижажев ведомствону коллегиясында айтхан эди.

Кесибизни къыралда чыгъарылгъан урлукъла бла жалчытыуну магъанасы нечик уллу болгъанын озгъан жыл кёргюзтгенди. Хасан Лабидович айтханнга кёре, аны себепли нартюх урлукъну чыгъарыу андан ары кёбейе барлыкъды.

Картоф урлукъну юсюнден айтханда уа, Россей аны бла кесин жаланда жети процентге жалчытады. Бу жаны бла бизни республика да себеплик этерге боллукъду. Урлукъчулукъ бла кюрешгенле былтыр андан беш минг тоннасын чыгъаргъандыла. Регионну кесине уа жети минг тонна керекди. Сагъынылгъан умутла ишге кёчселе, бу бёлюмде да жетишим болургъа ушайды.

Терек зыгытла чыгъарыуда республиканы жетишимлери баямдыла. «Быллай бахчачылыкъ бизге тёрели бёлюм болуп къалгъанды. Жемиш терекле, наныкъ юлкюле орнатыу жаны бла ал беш регионну санына киребиз. Сёз ючюн, былтыр ала алгъан бахчаланы ёлчеми 1,5 минг гектаргъа кёбейгенди», - дегенди министр.

Иш алай болуруна кёп зат этеди себеплик. Зыгытла ёсдюрюу бла онбеш мюлк кюрешеди; былтыр ала юч миллион чакълы терекчик хазырлагъандыла. Аны бла республикада излемни артыгъы бла окъуна жалчытхандыла. Тереклени асламысы алмады эм кертмеди. Ала тыш къыралладан келтирилген тюрлюлерине бир жаны бла да оздурмайдыла.