Эм иги суратла сайланнгандыла

Россейде от тюшюуден къоруулау служба къуралгъанлы - 374 жыл, Къабарты-Малкъарда уа 189 жыл толгъанына атап, МЧС-ни регионда Баш управлениясы, От тюшюуге къажау-къутхарыу служба, Жарыкъландырыу эм илму министерство, от ёчюлтюучюлени битеукъырал обществоларыны бёлюмю сабий суратланы конкурсун бардыргъандыла. Аны мураты гитчелени от бла ойнаудан тыйыу, аланы къоркъуусуз жашау бардырыргъа юйретиу, къутхарыучуну усталыгъыны даражасын кётюрюу мурат бла ётдюрюлгенди.

Анга республиканы битеу мектеплеринден окъуучула къатышхандыла. Ала эришиуге чыгъармачылыкъ кёзден къарагъанларын, суратларында от тюшюуню жорукъларына сансызлыкъ этиу къаллай хатагъа келтирирге боллугъун ачыкъларгъа кюрешгенлерин белгилерчады. Окъуучуланы ишлери эки къауумгъа юлешиннгендиле; «от тюшюуге къоркъуусузлукъ сабийлени кёзлери бла» эм «от ёчюлтюучюню иши – жигитликни усталыгъы». Алада эм игилеге Дмитрий Талаевни, Эрнела Иванованы, Бегийланы Даниярны эм талай башха окъуучуну ишлери саналгъандыла. Ала Спорт министерствону дипломлары эм грамоталары, «Нальчик-сладость» обществодан да татлы ашарыкъла бла саугъаланнгандыла.