Шахарны къоруулагъанланы хурметлегендиле

Онюч жыл мындан алда, 2010 жылда 25 мартда, Нальчикге «Махтаулукъну шахары» деген сыйлы ат берилгенди. Эсигизге салайыкъ, бизни къыралда аллай атны жюрютген 45 шахар барды.

  Ол жыл анга аталып шахарда Байсолтанов атлы орам башланнган жерде паркда эсгертме орнатылгъан эди. Андан бери жыл сайын урушну, урунууну ветеранлары, школчула, устазла да, алайгъа келип, эсгертмеге гюлле саладыла.

Озгъан шабат кюн да, эрттенликде сагъат онда алайгъа кёп адам жыйылгъан эди. Аланы алларында Урушну, Саутланнган кючлени эм право низамны сакълаучу органларыны ветеранларыны Нальчикде советини башчысы полковник Абдуллаланы Мустафа сёлешгенди.

- Уллу Ата журт урушну кезиуюнде Къабарты-Малкъардан къазауатха кетген жашладан, къызладан къыркъ мингден артыкъ адам ёлгенди. Ала фашизм, нацизм бла уруш эте жан бергендиле. Ол малгъунла уа энтта да баш кётюре тебирегендиле. Къыралыбызны чачаргъа кюрешедиле. Биз аланы энтта да хорларыкъбыз, ууатырыкъбыз. Хорлам бизни боллукъду», - дегенди.

Андан сора келгенле эсгертмени аллына гюлле салгъандыла, алайда суратха тюшгендиле.