Хурметине – эсгериу къанга

Нальчикни 19-чу орта школунда Росгвардияны Къабарты-Малкъарда Управлениясыны ОМОН «Вершина» бёлюмюню аскер борчун толтура тургъанлай ёлген келечиси полицияны тамата сержанты Альберт Геховха эсгертме къанга салгъандыла. 

Бу ишге Росгвадияны башчылары эм энчи составы, аскерчи ветеранла, Билим бериу департаментни келечилери, окъуучула бла устазла, ёлген полициячыны анасы Марина Борисовна эм аны жууукъ-ахлулары къатышхандыла.

- Альберт кесини аскер борчуна ахыр кюнюне дери кертичилей къалгъанды. Аны эсибизде тутуп, ол кесини Ата журтуну аллында этген жигитликни ёсе келген тёлюге айтыргъа бизни борчубузду, - дегенди Росгвардияны жер-жерли Управлениясыны таматасыны орунбасары полковник Алексей Трушин.

Эсгертме къанганы уа ол администрацияны инфомация-аналитика бёлюмюню таматасы Зураб Хабекиров бла бирге ачханды.

Школну совети кадет классха Альберт Геховну атын берирча оноу чыгъаргъанды.

Ишни ахырында келгенле эсгертмеге гюлле салгъандыла эм бир минут шош туруп эсгергендиле.