Тахта кёгетлени жыйыу бошала турады

Тахта кёгетчилик бизни республикада не заманда да иги кёрюмдюле бла къууандыргъанды. Бу бёлюмде уруннганла картоф, хобуста, сохан, чюгюндюр, быхы ёсдюредиле. Эл мюлк министерствода айтханларына кёре быйыл ала быхыны урлугъун асламыракъ жерге сепгендиле. Тенглешдирип айтханда, ол былтырдан 16 процентге кёпдю. Чюгюндюр бла сохан ёсдюрюлген жерлени ёлчеми да алты процентге кёбейгенди, хобуста уа былтырча аллай бир жерде битеди. Картоф бла да алайды, ол алгъынча жети минг гектарны алады.

Картофну санамаса, башха тахта кёгетле 16,8 минг гектарда ёсдюрюледиле. Озгъан жыл бла тенглешдиргенде бу кёрюмдю тогъуз процентге кёбейгенди.

Шёндю тирлик жыйыу бошала турады. Продукцияны аслам кесеги, министерствода айтханларына кёре, къышха сакъланырыкъды.