Минги тауну этеклеринде къоркъуусузлукъну жалчытырыкъдыла

Минги тауну этеклеринде ары келген жолоучуланы къоркъуусузлукъларын жалчытырча къутхарыучула тургъан юч модуль база орнатырыкъдыла. Излеу эм къутхарыучу къауумла жолоучуланы бла альпинистлени къоркъуусузлукъларын жалчытырыкъдыла.

 Къутхарыучула жангыдан ишленнген «Онбиреуленни ышыгъы» къонакъ юйде турлукъдула, деп билдиргендиле МЧС-ни регион бёлюмюнден. Сау кюнню ичинде он къутхарыучудан аслам къыйын болумгъа тюшгенледен билдириулени сакълап турлукъдула. Ол амал болушлукъну кезиуюнде тапдырыргъа онг берликди.     

«Минги тауну этеклеринде МЧС юг эм север жер участкаланы белгилегенди эм ол тийреледе къутхарыучула турурча терк сюеген модуль юйлени саллыкъдыла. «Кавказ.РФ» акционер общество бла келишгенибизге кёре, ала «Онбиреуленни ышыгъына» жангыдан тынгылы ремонт этерикдиле. Аны биринчи этажында 11 къутхарыучу турурча отоула къураллыкъдыла.  Аллай бир адам чылмыкъгъа тюшген кезиуледе Минги тауну этеклеринде къутхарыу ишлени бардырыргъа тамамды», -  дегенди МЧС-ни КъМР-де Баш управлениясыны таматасы Михаил Надежин.

Жыйыллыкъ модульланы бирин Минги тауну юг жанында 3 850 метр бийикликде (Гара-Башы) деген жерде, эки модульну север жанында 2,5 минг метр бийикликде, ючюнчю модульну 3,8 минг метр бийикликде орнатырыкъдыла, деп билдиредиле КъМР-ни Башчысыны бла Правительствосуну пресс-службасындан.

Бизни корр.