Миллет ашарыкъла, альпинизмден дерс, сейирлик жолоучулукъла

Республиканы Курортла эм туризм министерствосуну себеплиги бла НТВ телеканалны «Поедем, поедим!» бериуюню къаууму Къабарты-Малкъаргъа келгенди. Программаны баш жигити Федерико Арнальди якны этин татханды, жолоучу азыкъ жарашдыргъанды, лакумбургерни кёргенди.

Министерствону пресс-службасыны башчысы Ольга Погребняк билдиргеннге кёре, тематикалы бериуню къаууму бизни республикагъа къонакъгъа экинчи кере келедиле. «Бусагъатда бериу тюрленнгенди, аны ведущийи да башхады. Арт кезиуде аш-азыкъ туримзге аслам эс бурулуп башлагъанды. Алай эсе уа, бизни борчубуз къараучуланы республикабызны алыкъа алай белгили болмагъан жерлери, сейир ашарыкълары бла шагъырейлендириудю. Бу жол съёмкалагъа бийик тау «Бызынгы» альпинист лагерьни, Акъ-Топуракъ ауушну, «LeapRus» экология къонакъ юйню къошханбыз, Нальчикде да иги кесек тургъанбыз», - дегенди ол.

Къабарты-Малкъар бла шагъырейлениу Нальчикни ара базарындан башланнганды - Фредерико эм алгъа ары барыргъа сюйгенди. Анда Арнальдини татлы, татымлы да тюш азыкъ бла сыйлагъандыла, таулуланы миллет ашарыкълары - сохта бла жёрме къалай этилгенлерин кёргюзтгендиле, экскурсия къурагъандыла. Ол да кесине бишлакъ, варенье бла жер-жерли чибижиле сайлагъанды. Ызы бла «Огъары Чирик кёлле» жангы къонакъ юй комплексде регионну Жаш тёлю арасыны директору Саида Жанимова къабарты гыржынны этгенди.

 Къабарты-Малкъарда биринчи кечесинде ведущий Бызынгы лагерьде ишленнген эрттегили таулу юйге ушашдырып ишленнген сакляда къалгъанды. Кюндюз а Эверестге чыкъгъан, халкъла аралы класслы къутхарыучу Аккайланы Азнаур бла чыранлагъа дери баргъанды, альпизмден дерс алгъанды, лагерьге къарагъанды. Мында аны жалбауур эм якны этинден жарашдырылгъан татлы азыкъ бла сыйлагъандыла.

Ючюнчю кюн а Чегем ауузуну поэзиясына бла тарыхына жораланнганды, Эл-Тюбюню келечиси Фредерикогъа элни жашырынлыкъларыны юсюнден хапарлагъанды. Минги таугъа уа жол жомакълы Акъ-Топуракъ ауушну юсю бла ётгенди, анда къауум табийгъатда ауузланыргъа тохтагъанды, тюш азыкъгъа этден лягурлибже сайланнганды. 

Тёртюнчю кюн да сейир къуралгъанды – программаны келечилери Минги тауда ратраклада «LeapRus» экоотельге дери кётюрюлгендиле, Нальчикге къайтханлай а шахарны тарых арасына бла ара солуу паркына баргъандыла. Ингирде уа Фредерикону миллет фастфудда лакумбургерле бла сакълагъандыла, аланы жангызда бизни республикада этедиле. Гастрономия съёмкала «Сосруко» ашханада бошалгъандыла, мында къонакъланы миллет тепсеуле, «Сосрукъну оту» азыкъ бла къууандыргъандыла.

Республикагъа жолоучулугъуну юсюнден Фредерико Арнальди былай айтханды: «Мен Кавказда бармагъан жер хазна къалмагъанды, алай тауланы алай жашил, жарыкъ тюрсюнлю сыфатларын а биринчи кере кёреме. Мындача табийгъат бир башха жерде тюбемейди, айтып бералмазча ариулукъ!»