Аны айырма ышанлары – чомартлыкъ, таза ниетлилик

  Мен жазыу усталыкъдан кенгдеме. Устазма. Болсада,  къолума къалам алып, экиге айланнган къарындашымы юсюнден жазаргъа  таукелленнгенме. Холаланы Владимирни жашы Ибрагимге бу кюнледе 50 жыл толады. Ол  КъМКъУ-ну стоматология  жаякъ-бет хирургия институтуну директоруну орунбасарыды,  клиника окъуу арасыны башчысыды, медицина илмуланы кандидатыды, хирургия кафедраны доцентиди, бийик  квалификация категориялы врачды.  КъМР-ни  Саулукъ сакълау, Жарыкъландырыу, илму  эмда жаш тёлюню ишлери жаны бла  министерстволарыны, КъМКъУ-ну кёп грамоталары, дипломлары бла да саугъаланнганды.

 Бу кюнледе уа  Къабарты-Малкъар къырал университетни Стоматология, жаякъ-бет институтуна   Холаланы Ибрагимни аты бла РФ-ни  Илму эмда  бийик билим бериу министерствосундан  бюсюреу къагъыт,  майдал да келгендиле.  Анда былай жазылады: «Билим бериуде жетишимлери  эмда кёп жылланы  бет жарыкълы  ишлегени, билим бериуде къырал политиканы жашауда бардырыугъа салгъан къыйыны ючюн».

Ибрагим, тукъумну ёхтемлигиди десем, ётюрюк айтмам. Къуру къуллугъу, билимлилиги бла  угъай, адамлыгъы бла да.  Жууукъну, тенгни  кёлю бла жюрюте билген, кимге да болушургъа ашыкъгъан адамды ол. Аны бош заманы азды, иши къыйынды, алай анга да къарамай,  кимге да  эс тапдырыргъа угъай демейди. Шуёхлары, танышлары да кёпдюле. Ала  къуру Къабарты-Малкъарда угъай, Дагъыстанда, Москвада, Чечен Республикада, Санкт-Петербургда, Саратовда, Израильде, Дубаиде, Пакистанда, дагъыда кёп башха жерледе  бардыла. Къайры барса да   ала  жарыкъ тюбейдиле.

 Дагъыда бир шарт -  шуёхларыны  хазна къалмай барыны да  арбазларында Хасаниядан элтилген назы терекле, туяла ёседиле. Россейни къой да, узакъ тыш къыраллада жашагъан танышлары уа алагъа Ибрагимни бетинден  таулу атла атайдыла.

      Ибрагим бла биз терк-терк тюбеше турабыз, ма бу жол да  ишини, жашаууну юсюнден да ушакъ эте,  кеси  ишлеген  солуу отоуунда олтурабыз.  Каминде отунла  жарыкъ жанадыла, Ибрагим, анда-мында аланы ышыра,    кеси тутхан чабакъладан шишлик  этеди. Ол къонакъ алыргъа бек сюеди, алагъа  ашны кеси  хазырлаучуду. Анга бек устады. 

Ишини юсюнден сагъатла бла айтып турургъа боллукъду.  Кеси уа   «бизни» деген сёзню терк-терк къайтарыргъа ёчдю.  Аны алайлыгъы уа ол  жашаууну аслам заманын ишде ётдюргени бла байламлыды. «Бизни институтубуз бюгюнлюкде бек уллуладан бириди. Анда окъургъа сюйгенлени саны да  кёпден-кёп болуп барады. Узакъ эмда жууукъ тыш къыралладан окъуна келедиле. Республикада ишлеген кёп къалмай битеу тиш докторла бизни институтну бошап чыкъгъанладыла»,-деп ёхтемленеди ол. 

   Мен а  бюгюннгю студентле  къаллайладыла, деп сорама. Ол а, ышарып, былай жууаплайды: «Манга алай сорсала,  эрттегили  таурух эсиме тюшеди. Римни сенатында ёсюп келген тёлюню юсюнден сёз баргъанда, сенаторла  кеслерини жаш заманлары бла тенглешдире эдиле.  Ол тарыхда бола тургъан затды. Хар тёлю да кесини заманындагъыланы махтап, шёндюгюлюлени сёгерге  кюрешеди. 

Алай мен алай айталлыкъ тюйюлме.  Студентлерибиз артда къайда ишлеселе да, бетибизни жоймайдыла.  Кёплери Москваны, Санкт-Петербургну, Ставропольну, Дагъыстанны, Ингушетияны, Шимал Осетия-Аланияны,  Германияны, дагъыда кёп башха къыралланы бла шахарланы  клиникаларында жетишимли ишлейдиле, кёплери кеслери энчи клиникала да ачадыла»,-дейди Ибрагим.

Ол алай айта туруп, мени уа ол кеси да  билимин, усталыгъын да ёсдюрюр ючюн кёп шахарлада болгъаны эсиме келеди.  Махачкъалада окъугъанды,  интернатураны, ординатураны да  Нальчикде  Республикалы стоматология поликлиникада  ётгенди.  Ызы бла уа Пятигорскда квалификациялы комиссияны оноуу бла «Терапевтическая стоматология»  усталыкъ берилгенди.  Аспирантураны да Пятигорскда бошагъанды. Илму ишин а  Саратовда  къоруулагъанды.

 Бюгюн-бюгече да  тыш къыралда,  Россейде болсун, тишлеге багъыу жаны бла  конференциялагъа  къатышханлай турады. «Билиминги, усталыгъынгы кётюре турмасанг, замандан  артха къалыргъа боллукъса, алай этерге уа жарамайды»,-дейди ол.

  Ибрагим юйюрюне да бек сакъды.  Атасы Владимир, анасы Жаппуланы Балажан, юй бийчеси Къулийланы Анжела, къызлары: Амина, Алина, Алия – ала барысы да уллу шуёх юйюр болуп жашау этедиле. Ол аланы хар бирини кёлюн алыргъа кюрешеди, къайгъырады. Анжела врачды, аны эки бийик билими барды, Амина да,  атасыча, медицина факультетни стоматология, «открытый институт» «психология» бёлюмлени, терапевтическая стоматология жаны бла  ординатураны бошагъанды. Бусагъатда  КъМКъУ-да  стоматология эмда жаякъ-бет  хирургия бёлюмде ассистентди.  Студентлени  окъутады.

Алина Москвада  И.М.Губкин атлы нефть эм газ къырал университетни экономика къоркъуусузлукъ  жаны бла факультетин бла КъМКъУ-ну юридический факультетин быйыл бошай турады. Ол  университетде уллу курсну старостасыды.  Окъуу юйню атындан  сууда жюзюуден спорт эришиулеге  жетишимли къатышады.

 Алия уа Нальчикде 2-чи номерли гимназияны 10-чу классыны окъуучусуду. Ол да, атасы бла анасыча, врач болургъа  мурат этеди.

Бу газет статьямы хайырланып, Ибрагимни битеу жууукъларыбызны атларындан, кесим энчи да  туугъан кюню алгъышлайма. Багъалы къарындашым, бек сюйген адамыбызса, саулугъунг бла узакъ ёмюрлени сюр, муратларынг толсунла, юйюрюнгден, юйдегингден къууанып жаша!