Кече жолда малла водительлеге уллу къоркъуудула

Жолда жюрюуню къоркъуусузлугъуну инспекторлары жолда жюрюуню къоркъуусузлугъуну жорукъларын ангылатыу  жаны  бла мадарла толтурадыла. Бу кюнледе   Чегем эм Зольск районлада болгъан тюбешиуледе малланы  жол жанында кютерге жарамагъаныны юсюнден баргъанды сёз, деп билдиргендиле бизге УГИБДД-ны пресс-службасындан.

Къыралавтоинспекторла малланы иелерине, эл мюлклени ишчилерине, сюрюучюлеге малла жол жанында кютюлселе, аланы ызларындан адам да къарамаса,  авария боллугъуна, адамла ачырыкъларына къоркъуу уллу болгъанны ангылатхандыла.  

Бютюнда уа кече жолда малны кёрмей,  водитель аны урургъа боллукъду. Аны себепли полициячыла элчилени кеслерини ырысхылары эмда жолда жюрюуге къатышханланы жашауларыны юсюнден сагъыш этерге чакъыргъандыла.  Малланы жол жанында кютмезге, аланы сюрюучюсюз къоймазгъа кереклисин къаты айтхандыла.

Ахырында инспекторла светоотражательлени юлешип, аланы къарангы кезиуде хайырлылыкъларын ангылатхандыла.