«Адамлыкъды жашауну мурдору, аны тас этмезге борчлубуз»

Арт жыллада битеу Россейде да къарыусуз жашагъан юйюрлеге эм таматалагъа, сакъат адамлагъа аслам эс бурулады. Жамауатха социал жаны бла къарауну къырал мардалары да тохташдыралгъандыла. Алагъа кёре, къыйналып жашагъан хар инсаннга да къыралны жанындан болушлукъ этиледи. Элбрус районда энчи социал ара да аны ючюн деп къуралгъанды. Бюгюн бу магъаналы учрежденияны  ишини юсюнден  хапарлайбыз.

-Бизни коллективибизни районубуз бек уста таныйды, келе – кете тургъанла жокъдула, жууаплы, керти адамла ишлейдиле, - дейди Комплекс араны башчысы Этезланы Мажит. – Жарсыугъа, пандемияны хатасындан ачыла,  жабыла турабыз, алай  битеу къарап тургъан адамларыбызгъа шёндю да болушургъа кюрешебиз.

Къурау – методика эм консультация бёлюмню таматасы Джаппуланы Хусей билдиргеннге кёре,  абадан адамланы бир бирлери  юйлеринде жумушланы кеслери да эталадыла, алай алагъа ушакъ нёгер керекди. «Не десек да, адам адамсыз болалмайды. Кёбюсюню сабийлери Москвада, Санкт – Петербургда эм башха уллу шахарлада жашайдыла. Аталарын, аналарын атып да къоймайдыла, ол узакъ жерлеге чакъырадыла, алай къартла ёмюрледен бери  жашагъан тауларындан, жамауатдан айырылыргъа сюймейдиле. Аллай адамлагъа социал ишчиле келип,  чай ичгенден сора, дунияда эм Эльбрус районда бола тургъан ишлени юсюнден хапарла бардырадыла. Кете туруп  эшитгенлери: «Энди уа не заманда келликсе?»- деген сёзледиле. Биз барыбыз да бир бирибизге жашаргъа болушабыз»,-дейди ол.

 Федерал законнга кёре, хар социал ишчи шахарда он, элде уа алты адамгъа къарайды. Таматаланы бир къаууму юйлеринден чыгъалмайдыла, Комплекс араны ишчилери аланы чачларын къыркъадыла,тюкенде къумач сатып алып, жыйрыкъла окъуна тигедиле

Араны бир бёлюмюню ишчилери  Тырныауузда, Быллымда, Огъары Бахсанда, Элбрусда болушлукъ керекли юйюрлеге жюрюйдюле, экинчи бёлюмю уа Кёнделеннге, Бедикге, Лашкутагъа. Болушлукъ алгъанланы саны 275 адам болады, аладан  113 – сю шахарда, 162 – си уа элледе жашайдыла. Не зат этилинеди? Телевизор неда быстыр жууучу машина  бузулсала – ремонт, коммунал жумушла ючюн тёлеуле, арбазланы сыйпау, аш хазырлау, быстыр жууу эм итиу салыу, юй жыйыу – кёпдюле н жумушла.

Элбрусчула социал ишчилерине бек ыразыдыла. Кёплени поликлиникагъа элтирге тюшеди, анда анализле бергенде да къатларында турургъа керекди, юйге къайтхандан сора да таматала жарсып турмазча, хар зат да тап боллугъуна ийнандырыргъа, жюреклерин шошайтыргъа да тюшеди. Бир – бирде стационар больницада багъылыргъа керек болса, социал ишчиле ары да барып турадыла, таматаланы кёллендиредиле. «Ачыкъ айтыргъа керекди: ынналарыбыз бла аппаларыбыз узакъ ёмюрлю болур ючюн, социал ишчиле къолларындан келгенни аямайдыла»,-дейди директор.

Олт айтханнга кёре, социал жаны бла  терк болушлукъ берге  бёлюмге уа  бек къыйналгъанла  келедиле. Ашаргъа ашлары, киерге кийимлери болмагъанла. Алагъа хакъсыз жылы аш, ун, пиринч, балтуз эм башха продуктла, сора кийим бериледиле. Элбрусчула кийилген, алай алыкъа тап формада болгъан кийимлерин арагъа келтиредиле, ала уа амалсызлагъа юлешинедиле. Бизнес бла кюрешген жашла ун, пиринч, балтуз эм башха затла бла болушадыла.

Этезланы Мажит Юйюрге психология – педагогика болушлукъ этген  бёлюмюню  юсюнден да айтханды. Жарсыугъа, жууапсыз ата – анала да тюбейдиле. Ала эсепдедиле. Сёз ючюн, ичгичиле эм наркоманла. Ала сабийлерине хата этмесинле деп, къалай жашагъанлары тинтилгенлей турады. Бир – бирле психологла бла ушакъладан сора жашауларын тюрлендиредиле.

Къурау – методика эм консультация бёлюмге уа адамла пенсияларыны юсюнден толу хапар билирге келедиле. Белгилисича, ол тюрленнгенлей турады. Ишлерге сюйген сакъатла къырал алагъа не зат бла болушаллыгъын сурайдыла. Дагъыда таматала Сбербанкда ахчалары не бола тургъанын  да билирге излейдиле. Аны уа  банкны кесини ишчиси келип ангылатады.

«Хар къыйналгъан адам болушлукъ алыргъа эркинди. Андан сора да, Элбрус районда жамауат бек кючлюдю, биз бир бирибизни къыйынлыкъда атмайбыз, - дегенди Этезланы Мажит. – Жюрек халаллыкъ болгъан жерде айныу да боллукъду. Адамлыкъды жашауну мурдору, аны тас этмезге борчлубуз».

Адамлыкъ…Уллайгъанла  тургъан жерге ремонт этилгенди, администрация орналгъан корпус а сакълайды ремонтун. Ол да адамлыкъны шартыды. Дагъыда къарыусуз жашагъанла аш хуржунланы, кийимлени алгъан отоулары таша жердеди, кёзге урунмагъан: ала уялмазча. Ол да адамлыкъны шартыды.